Қызылорда қаласының №2 сотында әлеуметтік төлемдерді ұлғайту мақсатында алаяқтық әрекет жасаған екі адамға қатысты қылмыстық іс қаралды. Сот оларды Қылмыстық кодекстің 190-бабының 3-бөлігі 1-тармағы және 4-бөлігі 2-тармағы бойынша айыпты деп таныды, деп хабарлайды “Адырна”.
Іс материалдары бойынша, екі азаматтың жүктілік, босану және бала күтімі бойынша мемлекеттік әлеуметтік төлемдер алушылардан жалған жұмыс орындарын көрсету арқылы мемлекетке шығын келтіргені анықталды.
“Соттың тергеу барысында анықталғандай, А. және Б. арнайы жоспар құрып, әлеуметтік төлем алушылардың атынан жалған құжаттар тапсырған. Бұл құжаттар арқылы олардың төлемдерін ұлғайтуға мүмкіндік жасалған. А. мен Б. қылмыстық әрекеттерінің салдарынан мемлекетке жалпы 22 миллион теңгеден астам шығын келтірген.
Сотталушылар өз кінәларын толық мойындап, жасаған әрекеттеріне өкінетіндерін айтып, залалды толық өтегендерін мәлімдеді. Сонымен қатар, А. өзінің жүкті екенін және балаларының бар екенін атап өтті. Жәбірленушінің өкілі залалдың толығымен өтелгенін және сотталушыларға қатысты талаптарының жоқтығын растады”, делінген хабарламада.
Қылмыстық істің нәтижесінде, сотталушылардың кінәсі толық дәлелденді. Судья жазаны тағайындау кезінде олардың кінәсін мойындағанын, жас балаларының болуын, залалды өтегенін және ауырлататын мән-жайлардың жоқтығын ескерді.
“А.-ға 5 жылға бас бостандығынан айыру жазасы тағайындалды, бірақ оның жаза мерзімі 14 жасқа толмаған балаларының болуына байланысты кейінге қалдырылды. Рақымшылық заңының қолданылуына байланысты А.-ның жазасы 3 жыл 4 айға қысқартылды.
Б.-ға 3 жыл 6 айға бас бостандығын шектеу жазасы тағайындалды. Рақымшылық заңының арқасында Б.-ның жазасы 2 жыл 4 айға дейін қысқарды”, делінген мәлімдемеде.
Қылмыстық құқық бұзушылықтың алдын алу мақсатында, сот бұл үкімді шығарды және қоғамды әлеуметтік төлемдерге қатысты мұндай алаяқтық әрекеттерге қарсы тұруға шақырды.
