Алматыдағы тәртіпсіздіктер кезінде Жаңаөзен қаласының тұрғыны Ислам Төребек қайтыс болды. Ол Алматы энергетика және байланыс университетінің 5-курс студенті, деп хабарлайды ”Адырна” ұлттық порталы Lada.kz сайтына сілтеме жасап.
Қайтыс болған жас жігіттің анасы Құралай Балхаева қайғылы оқиға 6 қаңтарда орын алғанын мәлімдеді.
– Жаппай тәртіпсіздік кезінде Ислам үйінен шықпады. Ал 6 қаңтар күні интернет жоқ болды, ол атыс орын алып жатқанынан бейхабар еді. Сол күні азық-түлік алуға далаға шыққан. Оқ жауып, қайтыс болады, – дейді Құралай Балхаева.
Ислам Төребек №19 мектепті бітірген соң Алматы энергетика және байланыс университетіне оқуға түсті. Биыл ол кандидаттық диссертациясына дайындалған. Ол 2022 жылдың наурыз айында 22 жасқа толар еді.
Анасының айтуынша, марқұм Ислам Төребектің денесі 11 қаңтарда Алматыдан Маңғыстауға жеткізілуі керек. Жерлеу 12 қаңтарда Жаңаөзен қаласында өтеді.
”Адырна” ұлттық порталы
