Өркендеу жолына түскен Қазақстанға ешқашан тоқмейілсуге, тоқтауға болмайды. ҚР Тәуелсіздігінің 30 жылдығына арналған салтанатты жиында Елбасы Нұрсұлтан Назарбаев осындай ой айтты.
«Ғасырлар бойы ата-бабалар ұлан байтақ жерді ақ білектің күшімен, ақ найзаның ұшымен қорғап, бізге мирас етті. Мен сол ата-бабалар аманатына әрдайым адал болдым. «Ел басына күн туса, ер етікпен су кешер. Арғымаққа күн туса, ауыздықпен су ішер» деген сөз бар. Жұртымның болашағы үшін жанымды аямадым. Бүгін арада 30 жыл өткен соң сол асқақ армандарымның орындалғанын көру - мен үшін зор бақыт. Жеткен барлық биіктер - біздікі және бәріміздікі. Оны ешкім де жоққа шығара алмайды», - деген Тұңғыш Президент орда бұзар жасқа келген Қазақстан болашақта қазіргіден де қуатты, әйгілі мемлекеттің біріне айналатынына сенім білдірді.
«Қазіргі күні біз алдымызға озық 30 елдің қатарына қосылу жөнінде ерекше мақсат қойып отырмыз. «Армансыз адам – қанатсыз құс» дегендей, өркендеу жолында бізге ешқашан тоқмейілсуге, тоқтауға болмайды», - деді Нұрсұлтан Назарбаев.
Айта кетейік, бүгін Мемлекет басшысы Қасым-Жомарт Тоқаевтың қатысуымен ҚР Тәуелсіздігінің 30 жылдығына орай салтанатты жиын өтіп жатыр.
Салтанатты іс-шараға ҚР Тұңғыш Президенті – Елбасы Нұрсұлтан Назарбаев, Үкімет мүшелері, Парламент депутаттары, мәдениет және қоғам, өнер, спорт қайраткерлері, зиялы қауым өкілдері қатысып отыр.
