Полиция Грузияда қайтыс болған Әсел Айтпаеваның алыс туысы Мұрат Мейірбековті ұстады, деп хабарлайды "Адырна" ұлттық порталы Polisia.kz-ке сілтеме жасап.
«Нұр-Сұлтан полиция бөлімі Грузияда қайтыс болған Қазақстан азаматы Әсел Айтпаеваның ата-анасының М.Мейірбековке шара қолдану туралы мәлімдемесі негізінде Қазақстан Республикасының Қылмыстық кодексі (Адам саудасы) 128 бабы бойынша сотқа дейінгі тергеуді бастады», делінген хабарламада.
Тергеу әрекеттері жүргізіліп жатыр. Сотқа дейінгі тергеу жалғасуда.
Естеріңізге сала кетейік, қазақстандық Әсел Айтпаева 5 мамырға қараған түні Тбилисиде түсініксіз жағдайда қайтыс болды. Қыздың денесі көп қабатты үйдің алдынан табылды. Тергеушілер анықтағандай, қазақстандық әйел өлім алдында зорланған. Жергілікті полиция күдікті 57 жастағы Зугдидидің тумасы және бұрын сотталған Бесик Тордуаны зорлау және өзін-өзі өлтіруге мәжбүрледі деген айыппен келесі күні қамауға алды. Өлімінің алдында Асель құрбысына Тордуамен сөйлескен бір сағаттық аудиожазбасын жіберіп үлгерген еді. Грузияның Бас прокуратурасы Әселдің алыс туысы Мұрат Мейірбековке сырттай айып тағып отыр.
"Адырна" ұлттық порталы
