Өткен аптада еліміздің бірнеше аймағында өрт шығып, салдарынан адам шығыны орын алды деп жазады «Адырна» ұлттық порталы.
Тілсіз жаудың бұл жолғы құрбандары да балалар болды. Осыған дейін Нұр-Сұлтан қаласының іргесінде болған өрттен 5 бірдей баланың ажал құшқаны есте. Ақпанның 19-ы күні де дәл осыған ұқсас қайғылы оқиға Жамбыл облысы, Сарысу ауданына қарасты Жаңатас қаласында болды. Жанында ата-анасы болмаған бес бірдей бүлдіршін отқа оранды.
Ал осыдан бір күн бұрын, яғни ақпанның 18-і күні Қызылордада да жер үй өртеніп, бес бала түтінге тұншыққан. Оқиға Қызылжарма шағынауданында болған.
Отқа оранған баспанадан анасы мен төрт қызы шығып үлгеріпті. Ал 2019 жылы дүниеге келген сәби бесігімен бірге жанып кеткен.
Қызылорда мен Жамбыл облысынан бөлек, осы күні Алматының іргесіндегі Тұздыбастау ауылында жер үй өртеніп кетті. Абырой болғанда адам шығыны жоқ.
Ал, Өскеменде өрт шыққан тұрғын үйден 13 адам құтқарылды. Ыс тиген 12 жасар бала ауруханаға жеткізілді. Баланың жағдайын дәрігерлер қалыпты деп бағалап отыр.
