Пандемия әсерінен 430 мыңнан астам кәсіпкер жұмысын тоқтатқан

1224

«Ақ жол» демократиялық партиясы фракциясының депутаттары барынша зарап шеккен шағын және орта бизнес кредиттерін 6 пайызбен іс жүзінде қайта қаржыландыруды кідіріссіз бастауды талап етті, деп хабарлайды «Адырна» ұлттық порталы ҚазАқпарат-қа сілтеме жасап.

«ҚР Президенті осы жылдың 1 қаңтарындағы Жолдауында «экономиканың зардап шеккен секторындағы шағын және орта бизнестің барлық қолданыстағы кредиттері бойынша жылдық 6 пайыздық мөлшерлемемен мемлекеттік субсидиялауды қамтамасыз ету қажет» деген болатын. Сонымен қатар Президент бұл мақсатқа қосымша 200 млрд теңге бөлінетіндігін, ал субсидиялау бағдарламасының жалпы көлемі 800 млрд теңгеге жеткізілетіндігін хабарлаған еді. Бұл тапсырма кәсіпкерлік қоғамдастық арасында үлкен резонанс тудырды», - деді Премьер-Министр Асқар Маминнің атына депутаттық сауал жолдаған Азат Перуашев. Мәжіліс депутатының дерегінше, тікелей пандемиядан және онымен байланысты шаралардан 1 миллионнан астам кәсіпкер зардап шекті. Бұл елімізде тіркелген бизнес субъектілерінің үштен екісін құрайды. Төтенше жағдайға және локдаун шектеулеріне байланысты 430 мыңнан астам кәсіпкер жұмысын тоқтатып, оның басым бөлігі әлі күнге дейін қызметін жандандырған жоқ. Әсіресе көлік, сауда және қызмет көрсету, қоғамдық тамақтану, қонақ үй бизнес, жылжымайтын мүлікпен байланысты операциялар салалары үлкен шығынға батты. Алайда Мемлекет басшысының тапсырмасына сәйкес еліміздің барлық өңірлеріндегі шағын және орта бизнес субъектілерінің кредиттерін қайта қаржыландыру жүргізілмей отыр. «Осыған орай біз Үкіметтен, Ұлттық банктен және ҚР Қаржы нарығын реттеу және дамыту агенттігінен зардап шеккен барлық шағын және орта бизнестің кредиттерін 6 пайызбен қайта қаржыландыруды шұғыл, кідіртпестен бастауды өтінеміз. Сонымен қатар Президент Жолдауының орындалуын сөз бұйдаға салған лауазымды тұлғаларды анықтап, жауапкершілікке тартуды сұраймыз», - деді Азат Перуашев.

Фото ашық дереккөзден алынды

«Адырна» ұлттық порталы

Пікірлер
Редакция таңдауы