Алматы облысы 89,3 млрд. теңгенің азық-түлігін өндірді

834

Алматы облысының кәсіпорындары биылғы жылдың қаңтар-сәуір айларында 89,3 млрд. теңгенің азық-түлігін өндірді

Алматы облысында өнеркәсіптің өңдеу секторының үлесі 86,6% болып, республикадағы жоғары көрсеткішке жеткен. Соның ішінде азық-түлік өндіру үлесі 40%-дан асады. Мәселен, биылғы жылдың қаңтар-сәуір айлары аралығында облыс кәсіпорындары 89,3 млрд. теңге болатын немесе өткен жылдың 114,2%-на тең келетін азық-түлік өнімдерін өндірді. Бұл туралы «Адырна» облыс әкімінің баспасөз қызметіне сілтеме жасап хабарлайды.

Облыстық кәсіпкерлік және индустриалды-инновациялық даму басқармасының мәліметінше, өңірдің өнеркәсіптік әлеуетін мыңнан астам кәсіпорын құрап отыр, онда 70 мыңнан астам адам жұмыс істейді. 2020 жылдың 1-ші жартысында «Жетісу Соя», «AGRITECH», «Секвойя плюс», «Catexpo», «Alacem», «Феникс Фид Миллс», «Ақтоғай Ресайклинг», «Алмаз Керамикс», «ТКМЗ» ЖШС-ларының индустриалды жобалары жүзеге асырылады, соның арқасында 850 жұмыс орны ашылады деп күтілуде.

Жалпы өткен жылы облыс өнеркәсібінде сусын өндіру - 12,7%, жеңіл өнеркәсіпте -  29%,  фармацевтикада - 20,1%, дайын металл бұйымдарында - 38,9%, машина жасауда 60%-ке ұлғайтылған.

Соның ішінде облыс өнеркәсібінің жалпы көлемінің 40%-дан астамын тамақ өнімдері мен сусын өндіру құрайды. Мәселен, облыста жылына шамамен 1 млрд. литр  сусын шығарылады, өнімнің ассортименті үнемі молаюда. Биылғы жылдың қаңтар-сәуір айлары аралығында облыс кәсіпорындары 89,3 млрд. теңгенің немесе өткен жылдың 114,2%-на тең  келетін азық-түлік өнімдерін өндірді.

Облыс кәсіпорындары шығарған өнімдерін ішкі нарыққа саудалаумен қатар, сыртқа экспорттау географиясын да кеңейтіп келеді. Мәселен, жаңадан ашылған ет өңдеу кәсіпорынның бірі "Империя Фуд" ЖШС Қытай, Иран және басқа да елдер нарығына шықты. "АзияАгроФуд" ЖШС Қырғызстанға және Өзбекстанға ұн жеткізеді. Ал "Жаркент крахмал-сірне зауыты" ЖШС өнімдерін Қытайға, Қырғызстанға, Өзбекстанға, Тәжікстанға, Ресейге, сол сияқты "Хамле компании ЛТД" ЖШС кондитерлік өнімдерін Қырғызстанға, Ресейге, Өзбекстанға экспорттайды.

 

Алматы облысы

 

Пікірлер
Редакция таңдауы