Павлодар облысының полициясы WhatsApp-та тарап кеткен даулы видеоға қатысты тексеру нәтижелерін жариялады. Сот-медициналық сараптама жүргізу нәтижесінде видеодағы адам судья емес деген қорытындыға келді.
Қылмыстық істі тергеу аясында порнографиялық видеодағы қарнында тыртығы бар адамның кім екенін анықтау мақсатында сот-медициналық сараптама жүргізді.
Павлодар облыстық Сот сараптамасы институтының қорытындысына сәйкес, Әкетай М.А.-ға жүргізілген сот-медициналық куәландыру ұзын тыртықтар немесе хирургиялық ота іздерін таппады, - деді Павлодар облысының полиция департаменті
2 қазанда Павлодар облыстық сотының қылмыстық істер жөніндегі алқасының төрағасы полиция бөліміне келіп, whatsapp мессенджері арқылы таратылған порнографиялық видеоны шығарған және таратқан белгісіз тұлғаларды анықтау және қылмыстық жауапқа тарту туралы арыз берді. ҚР ҚК 130-бабы, 3-бөлігі және 274-бабы, 3-бөлігі бойынша сотқа дейінгі тергеу жалғасуда.
