قازاقستاندا ىم-يشارا ءتىلىن رەسمي تۇردە تانۋ ماسەلەسى قاراستىرىلىپ جاتىر، دەپ حابارلايدى "ادىرنا" ۇلتتىق پورتالى.
بۇل تۋرالى پرەمەر-ءمينيستردىڭ ورىنباسارى ەرمەك كوشەرباەۆ دەپۋتاتتىق ساۋالعا بەرگەن جاۋابىندا مالىمدەدى.
«حالىقارالىق تاجىريبە كورسەتكەندەي، ۇلىبريتانيا، يسلانديا، اۆستراليا، جاڭا زەلانديا، نورۆەگيا، اۆستريا، يسپانيا، شۆەتسيا جانە وڭتۇستىك افريكا رەسپۋبليكاسىندا ىم ءتىلى رەسمي ءتىل رەتىندە مويىندالعان. ءبىرىنشى كەزەڭدە قازاقستان رەسپۋبليكاسى ىم ءتىلى داكتيل ءالىپبيىن تانۋ بويىنشا شەتەلدىك مەكەمەلەردىڭ قاتىسۋىمەن حالىقارالىق تاجىريبەنى زەردەلەيتىن بولادى»، – دەدى كوشەرباەۆ جاۋاپتا.
كەلەسى كەزەڭدە مۇگەدەكتىگى بار ادامداردىڭ مۇددەلەرىن بىلدىرەتىن مەملەكەتتىك جانە قوعامدىق ۇيىمداردىڭ قاتىسۋىمەن قازاق ىم ءتىلى مەن داكتيل ءالىپبيىن بەكىتۋ ماسەلەسى قاراستىرىلماق.
مالىمەتكە سۇيەنسەك، قازىرگى تاڭدا داكتيل ءالىپبيى مەكتەپكە دەيىنگى، باستاۋىش جانە ورتا ءبىلىم بەرۋ دەڭگەيىندە «انا ءتىلى» ءپانىنىڭ قۇرامىندا قولدانىلادى.
ءبىلىم بەرۋ مينيسترلىگىنىڭ الداعى جىلدارعا ارنالعان جۇمىس جوسپارىنا سايكەس، ەستۋ قابىلەتى بۇزىلعان بالالارعا ارنالعان مەكتەپكە دەيىنگى جانە باستاۋىش ءبىلىم بەرۋ باعدارلامالارى جاڭارتىلماق. 2025–2030 جىلدار ارالىعىندا 36 وقۋلىق پەن وقۋ-ادىستەمەلىك كەشەن ازىرلەنەتىنى اتاپ وتىلگەن.
«بۇگىندە ءبىلىم بەرۋ باعدارلامالارىنىڭ تىزىمىندە «ارنايى پەداگوگيكا»، «ارنايى پەداگوگيكا: ءاۋتيزمى بار بالالاردى قولداۋ»، «سۋردوپەداگوگيكا»، «وليگوفرەنوپەداگوگيكا» جانە باسقا دا باعىتتار بويىنشا 60-تان استام باعدارلاما بار»، – دەلىنگەن حابارلامادا.
