2025 جىلدىڭ العاشقى ەكى ايىندا باتىس قازاقستان وبلىسىندا 655 ادام وڭىردەن تۇراقتى مەكەنجايىن وزگەرتىپ، باسقا جاققا قونىس اۋدارعان. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا ايتارلىقتاي جوعارى، دەپ حابارلايدى "ادىرنا" ۇلتتىق پورتالى ۋرالسكايا نەدەليا-عا سىلتەپ.
2024 جىلى وڭىردەن كەتكەندەردىڭ سانى 453 ادامدى قۇراسا، بيىلعى جىلى بۇل كورسەتكىش 200 ادامعا ارتقان. تۇرعىنداردىڭ كوبى استانا مەن الماتى قالالارىنا كوشكەن. رەسپۋبليكا اۋماعىنداعى كوشى-قون ناتيجەسىندە وبلىس 647 ادامعا ازايسا، شەتەلگە تەك 8 ادام عانا قونىس اۋدارعان.
2025 جىلعى 1 ناۋرىزداعى مالىمەت بويىنشا، باتىس قازاقستان وبلىسىندا 696 مىڭ ادام تۇرادى. جالپى حالىق سانىنا بۇل وزگەرىستەر ازىرگە ايتارلىقتاي اسەر ەتپەگەنىمەن، كوشى-قون ءۇردىسىنىڭ قارقىنى الاڭداتارلىق دەڭگەيگە جەتىپ وتىر.
سونىمەن قاتار، وڭىردە تۋ كورسەتكىشى دە كۇرت تومەندەگەن. 2025 جىلدىڭ قاڭتار-اقپان ايلارىندا وبلىستا بار بولعانى 676 ءسابي دۇنيەگە كەلگەن. بۇل – 2024 جىلعى وسى كەزەڭمەن سالىستىرعاندا 264 بالاعا از (وتكەن جىلى – 940 ءسابي).
ساراپشىلاردىڭ پىكىرىنشە، حالىقتىڭ كوشۋى مەن تۋ كورسەتكىشىنىڭ تومەندەۋى بولاشاقتا ءوڭىردىڭ الەۋمەتتىك-ەكونوميكالىق دامۋىنا كەرى اسەر ەتۋى مۇمكىن.
