Актер Шәріп Серік Әлия Бөтееваға қол көтергені үшін кешірім сұрады. Ол өзінің Instagram парақшасында арнайы видео жариялады, деп хабарлайды “Адырна” ұлттық порталы.
«Мен қаскүнемдік жасадым. Ол үшін заң бойынша барлық жазаны өтеуге дайынмын. Меніңше, көпшілігіңізге ұрыс кезінде болатын ашу, зұлымдық деген реакция таныс шығар. Менің жасағанымды қайталамаңыздар, қол көтермеңіздер», – дейді ол.
Актер Әлия Бөтееваға шапалақ бергенін де мойындап, ол үшін бойжеткеннен және ата-анасынан кешірім сұрады.
Айта кетейік, актердің лифтіге кіріп бара жатқан Әлияны қолынан жұлқылап, тартып алып кетіп бара жатқаны көрсетілген видеоны бойжеткеннің өзі жариялаған болатын. Осыдан кейін танымал тұлғалар, әлеуметтік желі оқырмандары Бөтееваға үлкен қолдау білдірді.
Бұл жағдайдан кейін Salem Entertainment актер түскен сериалдарды тоқтатты. «Патруль» сериалындағы Шәріп ойнаған сахналарды да алып тастамақшы. Кейбір компаниялар Шәріппен жарнамалық келісім-шартты үзгенін де хабарлады.
