Қазақстандағы танымал хабарландыру сайттарының бірінде елдің экс-президенті Нұрсұлтан Назарбаевқа тиесілі делінген, сатылуға ұсынылған 1993 жылғы Mercedes 600 SEL (Sonderschutz) GUARD B7 автокөлігінің өтпей келе жатқаны тағы да қоғам назарын аударды.
Қазақстанның экс-президенті Нұрсұлтан Назарбаевқа тиесілі делінген 1993 жылғы эксклюзивті Mercedes 600 SEL (Sonderschutz) GUARD B7 автокөлігі сатылымға шыққаны туралы былтыр да айтылған болатын. Хабарландыру берілгелі көліктің бағасы да аса көп өзгере қойған жоқ. Тек кей кезде 20 млн теңгеге төмендеп, кейін қайтадан 222 млн теңгеге көтерілген. Көлік сататын сайтта бұл бағаның басқа да осыған ұқсас көліктерден 218 723 016 теңгеге (6674,5%) қымбат екені де көрсетілген.
“ҚР алғашқы президентінің көлігі” делінген Мерседестің құны сан құбылған. Kolesa.kz сайтында бірнеше жыл бойы сатуда тұрған көліктің бағасы 222 млн - 200 млн арасында.
2022 жылы жарияланған хабарландыруда:
“Брондалған көліктің бағасы 25 млн теңге немесе шамамен 53 мың доллар болса, қазір оның құны 260 млн теңге деп көрсетілген”, - делінген. Ал көліктің қазіргі саудаланып жатқан бағасы — 444 мың доллар не 222 миллион теңге.
Аты-жөнін атамауды өтінген көлік эксперттерінің бірі экс-президенттің көлігінің неге әлі күнге дейін сатылмай тұрғанын былай түсіндіреді.
"Көліктің құрастырылғанына 30 жылдан асып кеткен. Оның құрал-саймандарын табу өте қиын. Ол көліктің қозғалтқышына қазір ешқандай сайман жоқ. Біздің нарықта бағаланбайтын көлік. Оны тек "президент мінді" деп қана бағалауға болады. Дәл осы көліктің 3 сатысы бар. Алғашқы шыққаны осы, екіншісі де аса бағаланбайды. Үшінші шыққан түрі ғана жоғары бағаланады. Бұл көліктің қазіргі нарықтағы бағасы ары кетсе 5 миллионға сатылады. Ол 222 миллионға тұрмайды. Оның салығы бар. Ескі көлікті алып, шамамен 700 мың теңге үкіметке кім салық төлегісі келеді?" - дейді автоэксперт.
КӨЛІКТІҢ ЕРЕКШЕЛІГІ ҚАНДАЙ?
Сатылымға қойылған көлік Германияда мемлекет басшылары үшін арнайы жасалған. Бұл туралы Kolesa.kz сайтында жазылған.
Ол B7 деңгейіндегі бронды қорғаныс капсуласымен жабдықталған, яғни Калашников автоматыннан атылған оқтарға және 4 кг тротилдік жарылысқа төтеп бере алады.
Көліктің сайттағы сипаттамалары ретінде зауыттық бронды капсула, B7 қорғаныс деңгейі, өрт сөндіру жүйесі, оқ өтпейтін отын багы, Continental CTS 265-40 R500 арнайы шиналары, 6 литрлік V12 қозғалтқышы ерекше аталған.
Сатушының айтуынша, дәл осындай модель Грузияның экс-президенті Эдуард Шеварднадзенің өмірін сақтап қалған. Оның көлігіне гранатометтен шабуыл жасалғанымен, президент аман қалған. Ал Ресей президенті Владимир Путин пайдаланған осындай Mercedes S600 Guard кейіннен 1,3 миллион еуроға сатылған.
ЭКС-ПРЕЗИДЕНТТІҢ КӨЛІГІ МЕ?
Kolesa.kz-тегі хабарландыруда көлік Қазақстанның тұңғыш президентіне тиесілі алғашқы көлік деп көрсетілген. Тіпті сатушы Назарбаевтың суретін жүктеген. Бірақ көлік иесі өзін Әсет деп таныстырған азаматпен Orda.kz тілшілері байланысқа шыққанда, ол тек «Барлық құжаттар бар» деп қысқа қайырған.
Бұған дейін дәл осындай Mercedes Астанадағы Тұңғыш президент музейінде тұрғаны туралы ақпарат тараған. Бірақ мұражай қызметкерлері бұл мәселе бойынша түсініктеме берген жоқ.
Ал Теміртаудағы Тұңғыш президенттің тарихи-мәдени орталығына тапсырылған Mercedes-Benz 2005 жылғы модель болған. Ал өзге бір көлігі Қаскелеңдегі "Атамекен" музейінде тұр.
РЕСМИ АҚПАРАТ БАР МА?
Назарбаевқа тиесілі болуы мүмкін көлік туралы ресми мәліметтер жоқ. Сатушының сөзіне сенсек, бұл – «бүкіл елдің тарихын бейнелейтін антиквариат». Дегенмен көліктің заңды иесі кім екені әлі белгісіз.
Қазір эксклюзивті көлік Тараз қаласында, сатып алушыларға келіп, тексеруге мүмкіндік бар екені айтылған. Сатушы «нағыз сатып алушы болса, саудаласуға болады» деп мәлімдеген.
Хабарландыруда көрсетілген көліктің құжатынан оның Президенттің автопаркіне тиесілі болғанын байқауға болады. Бір қызығы осы құжатта "көліктің қуаты" деген тұсқа әрқандай бір мәлімет жазылмаған. Бұл (техпаспорт) көліктің бұрынғы құжаты болуы мүмкін.
Осыған дейін Алматыда осыған ұқсас басқа да көліктердің сатылымға шығарылғаны айтылған. Бірақ хабарландыру, құлақтандыру сайттарына берілмеген. Алматыда сатылады деген сондай көліктердің бірін экс-президент мінгендігі айтылса, тағы да бірінің Премьер-министр, әлде Сыртқы істер министрі кезінде қазіргі ел басшысының қолданысында болғаны туралы нақтыланбаған мәлімет тараған.
ЖЕЛІДЕГІ ПІКІРЛЕР
Желі жұрты көлік сатылымына қатысты түрлі пікір де білдірген. Қайрат есімді желі қолданушысы "Алмас едім" деп пікір білдірсе, mendesh4362 есімді оқырман "ақшасы бітіп қалып па, қашқалы жатыр ма екен" деп сұрақ қойған. Shamak.off есімді желі қолданушысы "Бояуы өзінікі ме? Май жемей ме екен?" деп сауал қойған. nagyzkazakh006 есімді оқырман "Байғұс Назарбаев, шамасы әйелдеріне ақша жетпей, көлігін сатып жатқан болар" деген сынды түрлі пікір қалдырған. Ал nurakhmetmyrzakhmetovich есімді оқырман "Ақша керек болған ба, жетпей жатыр ма екен? Халықтан сұраса жинап беретін шығар..." деп жазды.
