Қытай жасанды интеллектпен жабдықталған ұзақ қашықтыққа ұшатын аппарат шығарды. Жаңа Rainbow-9 (Цайхун-9) соңғы ұшқышсыз басқарылатын аппараты 10 мың шақырымнан астам қашықтықты бағындыра алады. Бұл туралы South China Morning Post (SCMP) газеті жазды, деп хабарлайды “Адырна” ұлттық.
Мәлімет бойынша, мемлекеттік CCTV телеарнасы Шэньси провинциясындағы аэродромда ұшу сынақтары кезінде Rainbow 9 түсірілімін көрсетті. Аппарат 20 сағаттан астам уақыт ұшқан.
Әскери сарапшы Сун Чжунпин басылымға Rainbow 9 аппаратына ЖИ жүйелерін орнату оның әскери тиімділігін айтарлықтай арттыратынын хабарлады.
Оның атап өтуінше, Rainbow-9 бір уақытта бірнеше ұшқышсыз аппаратты басқара алады. Бұдан бөлек, құрылғы басқарылатын жауынгерлік ұшақтармен бірге жұмыс істеуге қабілетті.
Басылым мәліметінше, аппарат 0,5-тен 0,75 Мах-қа дейінгі жылдамдықпен ұша отырып әуеде 40 сағатқа дейін бола алады. Бұл оған 10 мың шақырымнан астам қашықтықты еңсеруге мүмкіндік береді. SCMP атап өткендей, Қытай аэроғарыштық ғылыми-техникалық корпорациясы (CASC) әзірлеген Rainbow-9 «топтамадағы ең озық ұшқышсыз басқарылатын аппарат». Оның қанатының ұзындығы 24,8 метр, бұл 10 мың метрден жоғары биіктікте ұзақ мерзімді миссиялар өткізу үшін жеткілікті көтергіш күшін қамтамасыз етеді.
