Көкшетауда Ресей салып жатқан жаңа жылу электр орталығы (ЖЭО) 2028 жылы пайдалануға беріледі. Ақмола облысының әкімі Марат Ахметжанов құрылыс жұмыстарының қазіргі жағдайы туралы мәлімдеді, деп хабарлайды "Адырна" ұлттық порталы Информбюро қызметіне сілтеп.
"Сәуір айында қар ерігеннен кейін дайындық жұмыстары басталады. Нысанның жоспарлануы, құрылыс алаңын әзірлеу, қызметкерлерге арналған тұрғын және қызметтік ғимараттар салу жұмыстары жүргізіледі. Қазірдің өзінде "КөкшеЖЭО" коммуналдық кәсіпорны құрылды. Жоба белгіленген 36 ай мерзім ішінде аяқталады деп күтілуде," – деді өңір басшысы.
Еске сала кетсек, Көкшетау, Семей және Өскеменде ресейлік инвестициялар есебінен үш жаңа ЖЭО салынуда. Нысандардың толық іске қосылуы 2028 жылға жоспарланған. Көкшетау ЖЭО-сының белсенді құрылыс кезеңі 2024 жылдың жазында басталды.
