Қостанайда полиция қызметкерлері жергілікті тұрғынды ірі көлемде алдауға көмектескен екі 17 жастағы жасөспірімді ұстады, деп хабарлайды "Адырна" ұлттық порталы.
Алаяқтық телефон қоңырауынан басталған. Бейтаныс адамдар әйелге оның келіні жаяу жүргіншіні қағып кеткенін айтып, мәселені шешу үшін 7 миллион теңге талап еткен. Қорыққан әйел қолында бар 2 мың долларды белгісіз адамға беріп жіберген. Кейін ол туыстарымен сөйлесіп, ешқандай жол-көлік оқиғасы болмағанын білген.
Полиция алаяқтарға көмектескен екі жасөспірімді ұстады. Олар шетел валютасын айырбастап, қаражатты басқа шоттарға аударған.
Сол күні олар дәл осындай схема арқылы тағы 1 миллион теңге алып, аударған, бірақ жәбірленуші әлі анықталмаған. Белгілі болғандай, жасөспірімдерге бұл жұмысты Telegram-арна арқылы ұсынған.
Қазіргі уақытта алаяқтық фактісі бойынша сотқа дейінгі тергеу жүргізілуде.
