Kóktem kelgen saıyn elimizde sý tasqyny qaýpi kúsheıe túsetini belgili. Osyǵan baılanysty Kókshetaý qalasy ákimdigi ótken jylǵy jaǵdaılardy eskere otyryp, aldyn alý jumystaryn kúsheıtti. Keshendi sharalardy qolǵa aldy. Bul týraly brıfıng barysynda qala ákiminiń orynbasary Aqjol Qylyshbaev málim etti, dep habarlaıdy Óńirlik kommýnıkaııalar qyzmetinen.
Kókshetaý qalasynyń aýmaǵynda Qylshaqty men Qopa kóli ornalasqan, al Krasnyı Iar aýyldyq okrýginen Shaǵalaly ózeni aǵyp ótedi. Bul – sý tasqyny qaýpi joǵary aımaqtar. Osy rette qala ákimdigi ınjenerlik jumystardy júıeli túrde júrgizýde.
«Qys boıy qala kóshelerinen 200 myńnan astam tekshe metr qar shyǵaryldy. Sý basý qaýpin azaıtý maqsatynda aryq júıeleri, sý ótkizý kanaldary, ózen arnalary tazartyldy. Sonymen qatar, bıyl alǵash ret qysqy senbilik uıymdastyrylyp, 16 000 tekshe metrden astam qar syrtqa tasymaldandy. Qala aýmaǵynda 6 km astam sý burý aryqtary tereńdetilip, 6,4 km aryq-kanal júıesi qalpyna keltirildi. 53 sý ótkizý qubyry aýystyrylyp, nóserli káriz júıeleri ystyq sýmen tazartyldy» , dedi spıker.
Sý tasqynyn boldyrmaý úshin Qopa kóli men Qylshaqty ózeni quıylatyn jerde muz jarý jumystary bastalyp ketti. Bul ózendegi sý deńgeıin rettep, kóktemgi sý tasqynynyń aldyn alý úshin mańyzdy qadam.
«Kókshetaýda sý tasqynyna qarsy kúreske 62 tehnıka birligi, 25 jumysshy, 17 arnaıy tehnıka men 18 motopompa jumyldyrylǵan. Qosymsha 9 motopompa satyp alynyp, taǵy 8-in alý josparlanýda. Sondaı-aq, qala qoımalarynda 10 000 qap, 20 000 tonna ınertti materıal, janarmaı qory saqtalǵan. Qaýipti aımaqtarǵa 4 150 qap tóseldi, 14 mekenjaı boıynsha sý basýdyń aldyn alý jumystary júrgizildi»
Qala ákiminiń orynbasarynyń aıtýynsha, tótenshe jaǵdaı oryn alǵan jaǵdaıda «Transportnık» saıajaı turǵyndary qaýipsiz aımaqqa kóshiriledi. Sonymen qatar, mal evakýaııasy men jem-shóp qoryn saqtaý jospary ázirlengen.
«Kókshetaýdaǵy sý tasqyny kezeńi tolyq baqylaýda. Barlyq qaýip-qater eskerilip, tıisti sharalar qabyldanyp jatyr. Turǵyndardan kez kelgen tótenshe jaǵdaı kezinde jedel shtabqa habarlasý suralady», dep qorytyndylady ol.
