15 наурыз күні ресейлік әскери ұшақтар тобы Жапон теңізі аймағында Оңтүстік Кореяның әуе қорғанысы сәйкестендіру аймағына (KADIZ) кірді, деп хабарлайды “Адырна” ұлттық порталы Yonhap агенттігіне сілтеме жасап.
Оңтүстік Кореяның Қарулы күштері баспасөз қызметі хабарлағандай, ұшақтар жергілікті уақытпен 09:20-да (Астана уақытымен 06:20) аймаққа еніп, біраз уақыттан кейін шыққан.
Осыған жауап ретінде Оңтүстік Корея өз жойғыш ұшақтарын әуеге көтерді.
Мәскеу бірнеше рет Оңтүстік Кореяның әуе қорғанысы сәйкестендіру аймағын біржақты белгіленген деп танымағанын мәлімдеген. Сондықтан бұл аймақ басқа елдер үшін құқықтық міндеттемелер тудырмайды.
Дегенмен, Сеул бұл аймақтың заңдылығын талап етіп, осы аумақты кесіп өту жоспарлары туралы хабарлауды сұрайды. Осы себепті, Оңтүстік Корея әуе кеңістігі бұзылмаса да, өз жойғыш ұшақтарын шығарады.
