2 наурызда АҚШ-тың Firefly Aerospace компаниясының Blue Ghost ұшқышсыз ғарыш кемесі Айға сәтті қонды, деп хабарлайды “Адырна” ұлттық порталы Reuters агенттігіне сілтеме жасап.
Бұл оқиға жеке компаниялардың Айға қону жарысындағы маңызды кезеңдердің бірі.
Blue Ghost ғарыш кемесі Астана уақытымен 13:35-те Айдың солтүстік-шығыс бөлігіндегі Моря Кризисов аймағына сәтті қонды.
Көлемі шағын көлікке ұқсас төрт дөңгелекті аппарат Айға 10 ғылыми аспапты жеткізді. Ол екі апта бойы ғылыми зерттеулер жүргізеді.
Firefly Aerospace – Айға сәтті қонған тарихтағы екінші жеке компания.
Бұған дейін Intuitive Machines компаниясының Одиссей қондырғышы Айға жеткенімен, кеменің қону бұрышы дұрыс болмауынан көптеген борттық құралдар істен шыққан еді. Осылайша, Firefly Айға толықтай сәтті қонған алғашқы жеке компания атанды.
Айға қону тарихында АҚШ, КСРО, Қытай, Үндістан және Жапония сияқты бес мемлекет ғана жетістікке жеткен. АҚШ пен Қытай қазіргі уақытта Айға адам жіберу бағдарламаларын дамытып, жеке компаниялармен серіктестік орнатуда.
Blue Ghost Флоридадағы Кеннеди ғарыш орталығынан ұшырылғаннан кейін, 4,5 миллион шақырымдық сапарды еңсеріп, Жерден 383 мың шақырым қашықтықта орналасқан Айға жетті.
Бұл миссия жеке компаниялардың ғарышты игерудегі жаңа дәуірін көрсетіп, болашақтағы ғарыштық зерттеулер мен Айды игеру бағдарламаларына серпін бермек.
