Нұрсұлтан Назарбаевқа тиесілі Алматыдағы «Алатау» санаторийін 50 млн долларға сатты, деп хабарлайды "Адырна" ұлттық порталы.
«Выход к морю» telegram-арнасында тараған ақпаратқа сәйкес, экс-президентке тиесілі активті Нидерландтың Noord Holland Trading Company B.V. компаниясы сатып алған. Санаторий 174 млн долларға бағаланған, алайда нарықтағы әділ бағасының үштен біріне сатылған. Бұл келісім Нидерланд компаниясына ұзақ мерзімді шығындардан құтылуға және активті құпиялылығы жоғары юрисдикцияға көшіруге мүмкіндік берді.
1986 жылы кеңестік партия қызметкерлері үшін салынған «Алатау» санаторийі 90-жылдардың ортасында шаруашылық басқармадағы мемлекеттік корпорацияның бақылауына өтті. Назарбаевтың досы әрі жақын серігі Владимир Нидің туыстары бұл активтерді жекешелендірді.
"Назарбаевтың активтерін Noord Holland балансына көшіру — бұл тек қана «Назарбаевтар кланының» мүддесі үшін жасалған қорғаныс маневрі болуы мүмкін. Нидерландтық құрылым тек осы аталған активтерді ғана емес, сонымен қатар бірнеше балалар бақшасын, денсаулық лагерін, Алматыдағы «Достық» қонақ үйін, «Евразия-Строй» құрылыс компаниясын, Павлодардағы «Ирбис» теларнасын (РИА «Арна» ЖШС) және басқа объектілерді де бақылауына алды", - делінген хабарламада.
Noord Holland компаниясының директоры — Назарбаевпен байланысы бар, Нидерланды мен Ресей азаматтығын алған Анна Березина екені анықталған. Telegram-арна мәліметінше, Березина Владимир Ким мен Эдуард Огайдың Қазақстандағы миллиардтық активтерін өз атына жазған.
