Вашингтондағы әуеде болған жолаушы ұшағы мен әскери тікұшақтың апатына қатысты БАҚ жаңа мәліметтерді жариялады. Әуежайда бұл сәтте диспетчерлердің ауысымы толық болмаған. Бұл туралы New York Times АҚШ Азаматтық авиация федерациясының (FAA) алдын ала есептеріне сілтеме жасап жазды, деп хабарлайды “Адырна” ұлттық порталы.
Берілген ақпарат бойынша, Вашингтондағы Рональд Рейган атындағы әуежайда ұшақ пен тікұшақтың соқтығысуы кезінде диспетчерлік ауысым толық болмаған. Бірнеше міндетті бір диспетчер орындап, ол тікұшақтардың қозғалысын және ұшақтардың қонуын үйлестірген.
Есепте көрсетілгендей, үйлестіруді қиындатқан негізгі факторлардың бірі - қызметкерлердің жетіспеушілігі болды, себебі ұшақтар мен тікұшақтардың пилоттары әртүрлі радиожиіліктерді пайдаланып, бір-бірін әрдайым ести бермейді.
Сонымен қатар, АҚШ Тасымалдау қауіпсіздігі ұлттық кеңесінің (NTSB) өкілі Тодд Инман баспасөз мәслихатында ұшақ пен тікұшақ апатының тергеуі толық себептерін анықтағанша жалғасатынын айтты.
«Біздің мақсатымыз – не болғанын ғана емес, неге олай болғанын түсіну, сондай-ақ мұндай жағдайлардың болмауы үшін қандай шаралар қабылдауға болатынын ұсыну. Біз тергеуді енді ғана бастап жатырмыз, және бізде әзірге көп ақпарат жоқ, бірақ біз үнемі жаңартулар беріп отырамыз», - деп мәлімдеді ол.
Оның айтуынша, тергеу тобы орын алған жерден барлық маңызды дәлелдер жинағанша сонда болады.
«Біз алғашқы есепті 30 күн ішінде дайындауды жоспарлап отырмыз, бірақ соңғы қорытындылар тергеу толық аяқталғаннан кейін ғана жасалады», - деді NTSB өкілі, бұл апаттың ықтимал себептерін қазір болжамайтындарын айтты.
Сонымен қатар, құтқарушылар Вашингтондағы Рональд Рейган атындағы ұлттық әуежайына жақын жерде American Airlines жолаушылар ұшағы мен Black Hawk әскери тікұшағының соқтығысуы салдарынан Потомак өзенінен 18 қаза тапқан адамның денесін алып шыққаны анықталды.
CNN мәліметі бойынша, өзеннен ешбір тірі қалған адамды алып шығу мүмкін болмады, қазіргі уақытта құтқару жұмыстары жалғасуда.
American Airlines әуекомпаниясы ұшақта 60 жолаушы мен төрт экипаж мүшесі болғанын растады. Компания қаза тапқандардың туыстарына арналған телефон желісін ашты.
Black Hawk тікұшағында үш әскери қызметкер болған, деп хабарлайды CNN АҚШ Қорғаныс министрлігінің өкіліне сілтеме жасап.
АҚШ президенті Дональд Трамп бұл апат туралы "толық хабардар" екенін айтып, жағдайды бақылап отырғанын және жаңа мәліметтер пайда болған сайын оларды жариялайтынын мәлімдеді.
АҚШ Қорғаныс министрі Пит Хегсет X әлеуметтік желісінде Пентагонның жағдайды "белсенді түрде бақылап отырғанын" және қажет болған жағдайда көмек көрсетуге дайын екенін жеткізді.
АҚШ Азаматтық авиация федерациясы (FAA) хабарлағандай, Уичито қаласынан (Канзас штаты) ұшып шыққан жолаушы ұшағы сол күні 21:00 шамасында солтүстік америкалық шығыс уақыты бойынша немесе 02:00 Гринвич уақыты бойынша Black Hawk әскери тікұшағымен әуеде соқтығысқан. Рональд Рейган атындағы ұлттық әуежай барлық ұшақтардың ұшуын және қонуын тоқтатты.
Айта кетейік, Bombardier CRJ700 ұшағының апаты 30 қаңтарда түнде орын алды. Ұшақ Рональд Рейган атындағы әуежайға қонуға бет алған сәтте Потомак өзенінің үстінде әскери Black Hawk тікұшағымен соқтығысты. Тікұшақ оқу ұшуы кезінде болған.
