2025 жылғы 25 қаңтарда Моңғолияда ел президентінің бастамасымен «Дрон-2025» атты ұлттық дрондарды басқару чемпионатының ашылуы өтті, деп хабарлайды "Адырна" ұлттық порталы МОНЦАМЭ-ге сілтеме жасап.
Бұл жарыс «Буянт-Ухаа» спорт кешенінде ұйымдастырылып, елдің әр аймағынан мамандар мен әуесқойларды жинады.
Чемпионат дрон технологияларын насихаттауға, оларды ұлттық қауіпсіздік, ауыл шаруашылығы және басқа да маңызды салалардағы міндеттерді шешуге бейімдеуге бағытталған. Қатысушылар кәсіби, әуесқойлық, ойын түрлері және өздігінен құрастыру санаттары бойынша бақ сынады.
«Дрон-2025» ұлттық чемпионатының жеңімпаздарының есімдері 26 қаңтарда белгілі болды.
Бұл жарыс Моңғолияда инновациялық технологияларды дамытуда маңызды қадам болып қана қоймай, елдің дрон технологиялары саласындағы халықаралық аренадағы орнын нығайтуға ықпал ететін елеулі шараға айналды.
