Лос-Анджелес округінің шерифі Роберт Лунаның айтуынша, кем дегенде 13 адам хабарсыз кеткен. Олардың жоғалып кеткені өртпен байланысты ма, жоқ па, әзірге белгісіз екені айтылды.
Куәгерлердің айтуынша қала үстінен отты торнадолар көтерілуде.
Соңғы бірнеше күнде 180 000-нан астам адам өз үйлерін тастап кетуге мәжбүр болған. 11 қаңтарда өрт бұрын тиіспеген аумақтарға жетіп, билік эвакуация аймағын кеңейтті. Желдің басылуы мен ылғалдылықтың артуы өртті бақылауға мүмкіндік бергенімен, АҚШ Ұлттық метеорологиялық қызметі алдағы аптада ауа райы жағдайлары өрттің таралуына қайта ықпал ететінін ескертті.
Қалалық билік тұрғындарға өрт салдарынан ауаның ластануына байланысты көшеге сирек шығуды ұсынды. Ашық ауада жұмыс істейтін барлық адамдарға респиратор кию керектігін Лос-Анджелес округінің денсаулық сақтау департаментінің өкілі Аниш Махаджан айтты.
Еске сала кетейік, АҚШ-тың төтенше жағдайлар қызметкерлері алты күн бойы Лос-Анджелесте шыққан жойқын өрттерді сөндіруге тырысып жатыр. Жұма күні оттың жылдам таралуына себеп болған қатты жел бәсеңдеп, өрт сөндірушілерге кейбір ошақтарды бақылауға алды.
Жұма күні жергілікті билік миллиондаған долларға бағаланған зәулім үйлер тоналуы мүмкін деген қауіпке байланысты коменданттық сағат жариялады.
