Бүгін Ресей президенті Владимир Путин бірқатар ел басшысын Рождество және келе жатқан жаңа 2025 жылмен құттықтады. Олардың арасында президент Қасым-Жомарт Тоқаев пен экс-президент Нұрсұлтан Назарбаев та бар. Бұл туралы Кремльдің басасөз қызметі айтты, деп хабарлайды «Адырна» тілшісі.
Путин құттықтауын Әзербайжан президенті Ильхам Әлиевтен бастап, Қытай Халық Республикасының төрағасы Си Цзиньпинге де жолдады. Басқа да құттықтау алғандар қатарында Беларусь президенті Александр Лукашенко, Түркия президенті Режеп Тайып Ердоған, Үндістан премьер-министрі Нарендра Моди, Солтүстік Корея басшысы Ким Чен Ын, Куба президенті Мигель Диас-Канель бар.
Сондай-ақ ол бірқатар шетел мемлекеті мен үкіметтерінің бұрынғы басшыларына, атап айтқанда, Рауль Кастроға, Роберт Кочарянға, Нұрсұлтан Назарбаевқа, Серж Саргсянға, Герхард Шредерге құттықтау жеделхаттарын жолдады.
Еске сала кетейік, тәуелсіздік күні қарсаңында бұрынғы президент Нұрсұлтан Назарбаев Ресей президенті Владимир Путинмен кездесу үшін Мәскеуге барған болатын.
