Азия бокс конфедерациясы (ASBC) 2024 жылдың қорытындысы бойынша Best of the Asians сыйлығының түрлі номинацияларындағы жеңімпаздарын жариялады, деп хабарлайды "Адырна" ұлттық порталы.
Қазақстандық боксшылар үш жеке номинация бойынша марапатқа ие болды.
Ересектер арасында Азияның үздік боксшысы ретінде Сағындық Тоғамбай, 22 жасқа дейінгі Азияның үздік боксшысы ретінде Темірлан Мұқатаев, ал жастар арасында Торехан Сабырхан үздік деп танылды.
Сонымен қатар, Қазақстан бокс федерациясы 2024 жылы Азияның үздік ұлттық федерациясы атанды.
Еске сала кетейік, желтоқсан айының басында Тайландтың Чиангмай қаласында өткен ересектер арасындағы Азия чемпионатында Қазақстан құрамасы көш бастады. Ерлер командасы бес алтын, төрт күміс және бір қола жеңіп алды. Ал әйелдер құрамасы ел қоржынына бес алтын және бес қола, жалпы он медаль салған еді.
