7 желтоқсан күні Оңтүстік Корея президенті Юн Сок Ёль елдегі оппозиция басқаратын парламенттегі импичмент рәсімінен өтті, деп хабарлайды "Адырна" ұлттық порталы Ренхап ақпарат агенттігіне сілтеме жасап.
Агенттіктің мәліметі бойынша елдің бір палаталы парламенті – Ұлттық ассамблеяның 300 мүшесінің тек 195-і дауыс беруге қатысқан. Ал шешім қабылдау үшін депутаттардың кемінде үштен екі бөлігі қолдау қажет.
Алты оппозициялық партияның импичмент рәсімін бастағаны белгілі, олардың барлығы 192 орынға ие. Бұл бастаманың сәтті болуы үшін олар үкіметтік партия "Халық күшінің" кемінде сегіз депутатының қолдауын алу қажет. "Бүкіл ел бүгін Ұлттық ассамблеяда қабылданатын шешімді бақылап отыр. Барлық әлем бақылап отыр", - деп өкінішпен айтты парламент спикері У Вон Шик.
Үкіметтік партияның лидері Хан Дон Хун Оңтүстік Корея президенті Юн Сок Ёльден әскери жағдай енгізу туралы шешіміне байланысты отставкаға кетуін талап етті және оның ел үшін үлкен қауіп төндіретінін мәлімдеді. Ол өз мәлімдемесі "импичмент үшін қажетті дауыс санын" қамтамасыз етеді деп сенген еді, бірақ бұл іске аспады.
AFP агенттігі 5 желтоқсанда Хан Дон Хунның импичментті тоқтататынын айтқанын еске салды. Оның пікірін өзгертуіне, президенттің өз әрекеттерінің дұрыс емес екенін мойындамауы себеп болды. Хан Дон Хунның пікірінше, ел басшысы әскери жағдай кезінде контрбарлау басшысынан бірнеше маңызды саясаткерді "антиүкіметтік әрекеттері" үшін қамауға алуын тапсырған.
Оңтүстік Кореядағы ең ірі оппозициялық күш — "Тобуро" Демократиялық партиясы 4 желтоқсанда ел президентінің импичментін талап ететінін мәлімдеді. Партия сонымен қатар мемлекет басшысына, қорғаныс және ішкі істер министрлеріне, сондай-ақ "әскери жағдайды басқарушы және полиция бастығы сияқты негізгі әскери және полицейлік тұлғаларға" мемлекеттік төңкеріс жасады деп айып тағуды жоспарлап отыр.
Еске сала кетейік, 3 желтоқсан кешке Оңтүстік Корея президенті Юн Сок Ёль елде әскери жағдай режимін енгізгенін күтпеген жерден жариялаған еді. Бірақ 4 желтоқсан таңертең парламент оның жарлығын қолдамағаннан кейін оны жойды. Әскери жағдай кезінде парламенттің — Ұлттық ассамблеяның және саяси партиялардың жұмыс істеуі тоқтатылды. Юн бұл шараның қажеттілігін оппозицияның "антиүкіметтік қызметі" деп түсіндірді.
