АҚШ президенті Джо Байден Газа секторындағы әскери қимылдарды тоқтату үшін бар күш-жігерін салатынын мәлімдеді, деп хабарлайды "Адырна" ұлттық порталы.
Израиль мен Ливандағы «Хезболла» арасындағы бітім АҚШ пен Францияның делдалдығымен жасалған келісімнен соң күшіне енбек. Бұл туралы туралы Джо Байден мәлімдеді. Президенттің айтуынша, бұл келісім Газа секторында басталған соғыс нәтижесінде мыңдаған адамның өмірін қиған қақтығысты тоқтатудың негізін қалау үшін жасалған маңызды қадам болып табылады.
Израиль Қауіпсіздік кеңесі келісімді 10 дауыспен қолдап, 1 дауыс қарсы шыққаннан кейін, Байден Израиль премьер-министрі Биньямин Нетаньяху мен Ливан премьер-министрі Наджиб Микати арасындағы келіссөздер туралы айтты. Қарулы қақтығыстар Израиль мен Ливан шекарасында жергілікті уақыт бойынша таңғы 4:00-де (Гринвич бойынша 02:00-де) тоқтатылады деп мәлімделді.
"Бұл тұрақты бітімгерлік болуы тиіс, «Хезболла» және басқа лаңкестік ұйымдар Израильдің қауіпсіздігіне қауіп төндірмеуі керек", - деді Байден.
Израиль күштерін біртіндеп 60 күн ішінде шығарады, ал Ливан армиясы Израильмен шекаралас аумақтарды өз бақылауына алады. Бұл шаралар «Хезболланың» инфрақұрылымын қалпына келтірмеуін қамтамасыз ету үшін жасалады.
АҚШ қорғаныс министрі Ллойд Остин бұл келісімді «тарихи сәт» деп атап, Израильдің қауіпсіздігін қолдайтынын және оның өзін-өзі қорғау құқығын мойындайтынын айтты. Сонымен қатар, ол Газа секторындағы гуманитарлық жағдайды жақсартуға назар аударудың маңыздылығын да атап өтті.
БҰҰ Бас хатшысы Антониу Гутерриш бұл келісімді құптап, тараптарды өз міндеттемелерін толық орындауға шақырды.
