Қарағандыда автобус жол тайғақтығына байланысты жаяу жүргіншіні қағып кетті, деп хабарлайды «Адырна» ұлттық порталы.
Қарағанды облысының Полиция департаменті мәліметінше аймақта күрт салқындау салдарынан ондаған жол-көлік оқиғасы тіркелген. Солардың бірі адам өлімімен аяқталды.
12 қазан күні сағат кешкі жеті шамасында Қарағандыдағы Липецкая көшесінде 53 жастағы маршруттық автобус жүргізушісі мұзға тайып, 56 жастағы жаяу жүргіншіні қағып кеткен. «Зардап шеккен адам шұғыл түрде ауруханаға жеткізілгенімен, дәрігерлер бар күш-жігерін салғанына қарамастан алған жарақатынан көз жұмды», - деп мәлімдеді облыстық полиция департаменті.
Аймақтағы ауа райының күрт нашарлауына және жол қозғалысы ережелерін бұзуға байланысты соңғы тәулікте барлығы 22 жол-көлік оқиғасы тіркелді.
