АҚШ-та америкалық отбасы асырап алған Динара есімді бойжеткеннің өз-өзіне қол жұмсағаны айтылды. Қайғылы хабарды белгілі журналист, «Шетелдегі қазақ балалары» жобасының авторы Жанар Байсеміз жеткізді, деп хабарлайды «Адырна» тілшісі.
«Америкадан жеткен суыт хабар жып-жылы болып тұрған күздің күнін суытып жіберді. Бір сәтте айналамдағы әсем бояулар қарайып, шайылып кетті. Бұл қалай болғаны, неге, не үшін?! Сұрақ көп, жауап жоқ…Неткен өкініш…Неткен қасірет…Динара, кешір мені, кеш бізді…Рухың пейіште шалқысын. Жап-жарық едің… Қош бол, жарық күн»,— деп жазды журналист.
Айта кетейік, Қостанайда дүниеге келген аруды америкалықтар алты жасында асырап алған. Бірнеше жылдан кейін қыздың асыраушы ата-анасы ажырасып кеткен. Бұған дейін Динара жаңа отбасының бұзылуына байланысты депрессияға ұшырағанын жеткізген еді.
