Біріккен Араб Әмірліктерінің сыртқы істер министрлігі Францияда қамауға алынған ел азаматына барлық қажетті консулдық қызметтер көрсетуді сұрады, деп хабарлайды “Адырна” ұлттық порталы.
БАӘ-нің сыртқы істер министрлігінің ресми сайтында жарияланған дерек бойынша ел билігі Дуровқа қатысты істі бақылауға алған.
«Әмірліктер Ле Бурже әуежайында француз билігі ұстаған Telegram әлеуметтік желісінің негізін қалаушы Әмірлік азаматы Павел Дуровтың ісін мұқият қадағалап отыр. Сондай-ақ Франция үкіметіне оны барлық қажетті консулдық қызметтермен шұғыл түрде қамтамасыз ету туралы талап қойылды», – деп мәлімдеген елдің сыртқы істер министрлігі.
БАӘ өз азаматтарына қатысты істің барлық аспектілеріне қамқорлық жасау, қорғау және бақылауы Әмірлік үшін басымдық болып қала беретінін де атап өтті.
Айта кетейік, Франция соты Павел Дуровқа 12 түрлі айып таққан болатын.
