ҚР Парламент Мәжілісінің депутаты Мұрат Әбенов елімізді қара оранғандардың көбейіп бара жатқанына алаңдаушылық білдірді, деп хабарлайды “Адырна” ұлттық порталы. Бұл туралы ол Нұрлан имамның видеосымен желіде бөлісіп, өз ойын жазды.
Депутат уағыз айтатын имамдар ресми түрде Муфтиятқа қатысты тек Әбу Ханифа мазһабын ұстанатындар ғана болуы міндетті екенін айтты.
"Өз-өзін “ұстаз” деп атайтын, түсініксіз ағымдардың өкілі емес. Соңғы кезде қазақ ұлтының ежелден келе жатқан анау дәстүрі харам, мынау заты сәйкес келмейді, мына киім дұрыс емес деп араңдататын “уағыз” айтатындар көбейді", - деді Мұрат Әбенов.
Сондай-ақ, ол салт-дәстүрді дәріптеуде де діннің шиеленісіп кеткенін жасырмады.
“Домбыра тартпа, сәлем салма, бетті ашпа, тұсау кеспе” - деп халықты ашуын туғызатын насихатшылар пайда болды. Қазақ ислам дінінің "Әбу Ханифа" мазһабын, яғни Ханафи бағытының байырғы түркілік салт-дәстүрдің ислам дініне қайшы келмейтін тұстарын сақтап қабылдаған. Мысалы қазақ даласында адам қайтыс болғаннан кейін дүние-мүлкімен, мінген атымен жерлеу дәстүрі болғанын археологиялық қазбалардан көреміз. Олар исламға қайшы келетін болғасын осы жерде тұрғандар сол баяғы кездерде ол дәстүрден бас тартқан. Демек, қазақтың осы кезге дейін орныққан салт-дәстүрлерінің бәрі дінмен үйлескен , сәйкес келтірілген ұлттық құндылық. Оларды қазір ревизия жасап, жоққа шығарудың қажеті жоқ. Бізге Ханафи мәзһабы Ислам құндылықтарын ұлттық салт-дәстүрлермен ұтымды ұштастыра білгені үшін аса маңызды", - деді депутат.
Ал Нұрлан имам Тик ток желісіндегі тікелей эфирінде қоғамда қара киінетіндердің ісі қазақы салт пен санаға қайшы екенін жеткізді.
