Бішкекте шенеуніктер жеке көліктерімен жүре алмайды, деп хабарлайды "Адырна" ұлттық порталы қырғызстандық БАҚ-қа сілтеп.
Мұндай бастаманы Бішкек қаласының басшысы Айбек Джунушалиев көтерген. Енді жаңа ережеге сәйкес әкімдік қызметкерлері аптасына екі рет қоғамдық көлікпен қатынауға міндетті.
Одан бөлек, ережеде ведомстволық және аумақтық бөлімдердің, муниципалды кәсіпорындар мен мемлекеттік мекемелердің қызметкерлері сейсенбі мен бейсенбі күндері жұмысқа қоғамдық көлікпен қатынауы тиіс екені көрсетілген.
Нәтижесінде әр шенеунік автобустың санитарлық тазалығын және жолаушыларға қызмет көрсету сапасын бақылап, ай сайын есеп бермек.
Шенділерге кызмет көліктерін тек жұмыс уақытында ғана пайдалануға рұқсат беріледі. Бұл бастама қаладағы кептелісті азайтып, қоғамдық көлікке сұранысты арттырады деп жоспарланған.
