9 мамыр күні көлігіне Кеңес Одағының қызыл туын тіккен адаммен жанжалдасып қалған алматылық Жанболат Шайзада бес тәулікке қамауға алынды, деп хабарлайды “Адырна” ұлттық порталы. Қалалық әкімшілік сот оны ұсақ бұзақылық жасағаны үшін кінәлі деп тапты.
Сот үкімінде Жанболат Шайзада қоғамдық орында жол қозғалысын тоқтатып, жанжал шығарып, әдепсіз сөздер айтып, көлікке ілінген туды жұлып алып, «қоғамдық тәртіпті бұзды» деп көрсетілген.
Естеріңізге сала кетсек, 9 мамыр күні әлеуметтік желіде ер адамның көліктегі адамдармен жанжалдасып, көліктен қызыл жалаушаны жұлып алғаны бейнеленген видео тарады.
Айта кетейік, Қазақстанда кеңестік рәміздерге тыйым салынбаған. Ал оны Венгрияда, Чехияда, Польшада, Латвияда және Литвада, сондай-ақ Грузияда (2011 жылдан бастап) көпшілікке көрсетуге заң жүзінде тыйым салынған.
Кеңес Одағының туы көптеген елдерде ресейлік идеологияның белгісі болып саналады.
