Қазақстандық киногерлер батыр қыз Әлия Молдағұлова туралы көркем фильмді түсіруге дайындалып жатыр, деп хабарлайды "Адырна" ұлттық порталы ҚазАқпаратқа сілтеп.
Фильм Әлия Молдағұлованың 100 жылдығына және Жеңістің 80 жылдығына орай «Әлия» толықметражды көркем фильмі болып 2025 жылдың мамыр айында жарыққа шығады деп жоспарлануда.
Қазақтың батыр қызы туралы «Әлия» фильмінің сценариін мәскеулік журналист, тележүргізуші әрі актриса Алена Кулешова жазды.
Жобаның бас продюсері және сценаристерінің бірі - Александр Шухов. Оған фильм түсіру идеясы 2019 жылы келген.
«Қазақтың батыр қызы Әлия Молдағұлова Екінші дүниежүзілік соғысқа аттанғанда жасөсіпірім болды. Қолына қару алып, мергендік танытқан ол 78 жау әскерінің көзін жойып, Кеңес Одағының батыры атағын алды. Бұл оқиға мәскеулік журналист, тележүргізуші және актриса Алена Кулешованы баурап алғаны соншалық, өмірінің үш жылын биопиктің сценарийін жазуға арнады. Мифтер мен аңыздардан бас тартып, Алена өмірдің шынайы шындығын іздеді. Ол Әлияны жақсы білетін адамдарды тауып, олармен әңгімелесті», - деді Александр Шухов.
Оның айтуынша, жобаға 900 млн теңгеден астам қаражат жұмсалады деп жоспарлаған. Фильмнің түсірілім жұмыстары Қазақстаннан бөлек Беларусь елінде өтуі мүмкін.
«Әлия» фильмінің режиссеры — Ален Ниязбеков.
«Біз тек сенімді, сарапшылар растайтын және мойындайтын фактілерді қолдануды мақсат еттік. Мәскеу әскери мұрағаттарындағы жұмыс нәтижесінде драмалық материал үшін дәлелденген негіз жиналды», - дейді режиссер.
9 мамырда жалпыұлттық кастинг өтпек. Шығармашылық топ басты рөлде ойнайтын актрисаны Қазақстан тұрғындары арасынан іздейді.
«Біз сценариймен таныстық. Әлияның образын ашатын 15-16 жастағы, бойы 150-155 см болатын қазақ қызын әлі таппадық, бүкіл Қазақстан бойынша кең ауқымды ашық кастинг жариялаймыз», - деді кастинг директоры Гүлзура Есен.
Фильмнің түсірілімі күзде басталып, қыста аяқталмақ.
