Қарағандыда плоггингке қатысқан 100-ден астам адам Федоров су қоймасының аумағын тазартты. Жастар жүгіруге қатыса отырып, 150 қап қоқыс жинады.
- Бүгін плоггинг леп аталатын тамаша іс-шара өтті. Бір жағынан спортпен шұғылданамыз, ал екінші жағынан өз қаламызға пайда әкелеміз. Бұл өте керемет шара! Біздің тұрғындардан көшелерді таза ұстап, қоқыс тастамауға жауапкершілікпен қарап, табиғатқа ұқыптылық танытуды сұрағым келеді. Өйткені, қаламыздың таза болуы әрқайсымызға байланысты”, - деп есептейді экологиялық еріктілер қозғалысының жетекшісі Рахат Райымбеков.
Экоакция "Таза Қазақстан" аясында өтті. Оған Қарағанды Жастар ресурстық орталығының еріктілері, Бейсенов атындағы ҚР ІІМ академиясының қызметкерлері мен курсанттары қатысты. Іс-шара қала әкімдігінің қолдауымен өтті. Мұндай экоакциялар алдағы уақытта әлі де жалғасады.
Сондай-ақ, бүгін, 20 сәуірде жастар, еріктілер мен қоғам қайраткерлері ойшыл Абай Құнанбаев ескерткішінің аумағын, ал ҚарУ студенттері Е.А. Бөкетов ескерткішінің аумағын тазалады. Қарағанды техникалық университетінің оқытушылары мен студенттері академик Әбілқас Сағыновқа, Қазыбек биге, Қаныш Сәтбаевқа орнатылған ескерткіштерді ретке келтірді. Депутаттар мен қалалық мәслихат аппаратының өкілдері Жеңіс саябағында және Республика даңғылында тазалық шарасына қатысты.
Әлихан Бөкейхан ауданы прокуратурасының қызметкерлері белгілі кенші Түсіп Күзембаевтің ескерткіші аумағын тазалау және абаттандыру жұмыстарын жүргізді.
Қарағанды облысында "Таза Қазақстан" ауқымды экологиялық акциясы жалғасуда. Әр апта белгілі бір тақырыпқа арналған. Өткен апта "Киелі мекен" деп аталып, киелі орындар тазартылып, тарихи-мәдени ескерткіштердің аумақтары абаттандырылды. Келесі апта “Жасыл аймақ" деп аталып, ағаш егуге, аумақтарды көгалдандыруға арналады.
