Абай облысының Аягөз ауданында суға кеткен үш адам іздестірілуде, деп хабарлайды "Адырна" ұлттық порталы облыс әкімдігінің баспасөз қызметіне сілтеп.
«Аягөз ауданында бірден екі бағытта екі жедел-іздестіру шарасы жүргізілуде. Оқиға орнына дереу Абай облысы Төтенше жағдайлар департаментінің Жедел-құтқару жасағының қызметкерлері жөнелтілді», - делінген хабарламада.
«Шығыс» шаруа қожалығынан ат мінген ер адам Аягөз өзенінен өтіп бара жатып құлап, суға батып кеткен.
Борлы өзенінен өтіп бара жатқан трактор мінген екі ер адам да суда жоғалып кеткен. Олар «Шалқар» шаруа қожалығынан Қарағаш ауылына қарай бет алған болатын.
Су айдындарының көктемгі ластануына байланысты өзен ағынының жылдамдығы мен су астындағы көрінудің нашарлауынан сүңгуір арқылы іздеу жұмыстары қиындады, деп хабарлады әкімдік.
Іздестіру жұмыстарына Абай облыстық Төтенше жағдайлар департаменті, полиция департаменті, жергілікті полиция қызметі, Қорғаныс министрлігінің күштері мен құралдары, барлығы 41 адам, 4 жүзу кемесі, 5 бірлік техника, 3 ұшқышсыз ұшу аппараты жұмылдырылуда. Аягөз ауданына психологиялық көмек көрсету үшін Абай облысы Төтенше жағдайлар департаментінің психологтары жіберілді.
Сонымен қатар, Аягөз ауданында Аягөз – Бозай жергілікті тас жолының 20 шақырымында Аягөз өзеніндегі су деңгейінің көтерілуіне байланысты көпірдің жол бөлігін шайып кеткен.
«Қазір көпір арқылы көлік қатынасы жоқ. Шектеу белгілері қойылып, жол полициясының бақылауы ұйымдастырылды», - деп хабарлады ведомстводан.
Тұрғындарды өзеннен өткізу үшін ауданға Төтенше жағдайлар бөлімінің қызметкерлері жөнелтілді. Ал Аягөз ауданының әкімдігі жергілікті жерде төтенше жағдай жариялады.
