Ресейлік оппозиция жетекшісі Алексей Навальный қайтыс болды. Бұл туралы ол жазасын өтеп жатқан Ямало-Ненецк автономиялық округі бойынша Федералдық қылмыстық атқару қызметінің департаменті айтты, деп хабарлайды «Адырна» тілшісі РИА Новости-ге сілтеме жасап.
«16 ақпан күні №3 түзеу колониясында сотталушы Навальный А.А. серуендегеннен кейін бірден есінен танып, өзін нашар сезінді. Мекеменің медицина қызметкерлері дереу келіп, жедел жәрдем бригадасы шақырылды. Барлық қажетті реанимациялық шаралар жүргізілді, бірақ оң нәтиже бермеді. Жедел жәрдем дәрігерлері сотталушының қайтыс болғанын растады»,—делінген хабарламада.
Қазіргі таңда өлімнің себептері анықталып жатыр.
Еске салайық, былтыр «Вагнер» жалдамалы әскер тобының негізін қалаушы Евгений Пригожин Мәскеуге әскермен аттанып, Кремльдің зәресін ұшырғаннан кейін ұшақ апатынан опат болған еді.
