Áleýmettik jelide jedel járdem júrgizýshisin urǵan er adamnyń keshirim suraǵan vıdeosy tarady, dep habarlaıdy «Adyrna» tilshisi.
Beınejazbada kúdikti barsha qazaqstandyqtan keshirim surady.
«Assalaýmaǵaleıkúm, barsha qazaqstandyqtar, barsha musylmandar, qazaq eli! Men 2024 jyly 1 aqpan kúni ózim baryp berilmekshimin. Sebebi istep qoıǵan qııanatym kún bermeı jatyr. Bárinen, aq halattylardan keshirim suraımyn. Meniń zııan tıgizbek oıym bolǵan joq. Ondaı oıym bolmaǵan, bolmaıdy da. Menen jábir kórgen baýyrymnan keshirim suraımyn. Alla razylyǵy úshin keshirińizder. Qazaqstandaǵy musylman baýyrlar, barlyǵyńyz meni keshirip qoıyńyzdar. Óz qateligimdi túsinip otyrmyn»,—deıdi ol.
Nurbolat Dákebaev vıdeony ustalar aldynda túsirgen.
Eske salaıyq, 27 qańtarda Qaraǵandy turǵynynyń jedel járdem júrgizýshisin uryp-soqqanyn jazǵan edik. Er adam 1 aqpan kúni ustaldy. Qazirgi tańda ol ýaqytsha ustaý ızolıatoryna qamaldy.
<
