OLIMP.KZ букмекерлік кеңсесіне (БК) қатысты іс жаңадан ашылған мән-жайларға байланысты қайта қаралуда, деп хабарлайды «Адырна» ұлттық порталы ҚазТагқа сілтеме жасап.
Қазақстан Республикасының Бас прокуратурасы OLIMP.KZ ісі бойынша сотталғандардың туыстарының өтінішінен кейін жаңадан ашылған мән-жайлар бойынша істі қайта тергеу (тексеру) жұмыстарын жүргізу туралы шешім қабылдады.
«Айыпталушылардың туыстары Астана қаласы бойынша Ұлттық қауіпсіздік департаментіне «OLIMP.KZ» БК қылмыстық ісінің тапсырыспен орындалуы мүмкін фактісі бойынша тергеу жұмыстарын жүргізу туралы өтінішпен жүгінді», - деп жеткізді ҰҚКД өкілдері.
Айта кетейік, сотталғандарға 2014-2019 жылдар аралығында Betgames онлайн-казиносы түріндегі заңсыз ойын бизнесін жүргізді деген айып тағылды. Нәтижесінде, 90 миллиард теңгеден астам сомаға ойын салығы мен жеке табыс салығы төленбеген.
Осыған байланысты сот үкімі бойынша OLIMP.KZ банк шотындағы 20 миллиард теңгеге жуық ақшаның барлығы тәркіленді. Бұл ретте сот ойын салығы, жеке табыс салығы және заңсыз ойын ойнау кезеңінде есептелген өсімпұл түрінде қосымша 90 миллиард теңге өндіру туралы шешім қабылдаған болатын.
«Адырна» ұлттық порталы
