Мәскеуде өткен келіссөздерде Ресей президенті Владимир Путин тәжік әріптесі Эмомали Рахмонға Тәжікстанда орыс тілінің дамып жатқаны үшін алғыс айтты, деп хабарлайды "Адырна" порталы.
21 қарашада Рахмон Ресейге ресми сапармен барды. Шектеулі құрамдағы келіссөзде Путин 2022 жылы Тәжікстанда Ресейдің қолдауымен салынған орыс тілінде оқытатын бес мектеп ашылғанын еске салды.
«Биыл және одан кейінгі жылдары Ресей үкіметі бұл мектептерге оқулықтар үшін 200 миллион [рубль] бөледі, мен олардың жеткіліксіз екенін білемін, бірақ шешім қабылданды. Бізде Тәжікстаннан келген студенттер мен аспиранттар оқиды. ТМД елдері арасындағы ең үлкен квота Тәжікстанда – 900 адам. Біз бұл квотаны 2024-2025 жылдарға 1000 адамға дейін арттырып жатырмыз», - деді Путин.
Рахмон: «Рахмет», - деп жауап берді.
«Мен сізге алғыс айтуым керек, өйткені мен сіздің орыс тілін дамытуға және мәдениет саласындағы, жалпы гуманитарлық саладағы қарым-қатынастарымызға қаншалықты көңіл бөлетініңізді білемін. Бір кездері сіз республикада Тәжікстанның дарынды балаларын оқыту және тәрбиелеу орталығын және Маяковский атындағы орыс драма театрын құру туралы бастама көтердіңіз - бұл мақсаттарға Ресей Федерациясының үкіметі төрт және 3,5 млрд. рубль болды. Сондықтан бұл жоспарлар жүзеге асады», - деп келтіреді Кремль.ру Ресей президентінің сөзін.
Мәскеудегі келіссөздерде екі ел арасындағы сауда-экономикалық және гуманитарлық саладағы ынтымақтастықтың жай-күйі мен даму келешегі, Ресей-Тәжікстан стратегиялық әріптестігінің басқа да негізгі аспектілері талқыланады деп жоспарлануда. Президенттер өзекті аймақтық және халықаралық мәселелер бойынша пікір алмасады. Келіссөздер нәтижесінде бірқатар екіжақты құжаттарға қол қойылып, президенттер БАҚ өкілдеріне мәлімдеме жасайды.
