Бұған дейін Қарқаралы ауданының әкімі қызметін атқарған Ерлан Құсайын Қарағанды облысы әкімінің жаңа орынбасары болып тағайындалды, - деп хабарлайды "Адырна" тілшісі.
«Ерлан Құсайын білім, мәдениет, спорт, жастар және ішкі саясат мәселелерін қадағалайтын болады, ол бұрынғы депутат Ербол Әліқұловтың орнына келді», - деп хабарлады Қарағанды облысы әкімдігінің баспасөз қызметі.
Ерлан Құсайынның үш жоғары білімі бар, Бөкетов атындағы Қарағанды мемлекеттік университетін «қазақ тілі мен әдебиеті пәнінің мұғалімі» мамандығы бойынша, Қазтұтыну одағы Қарағанды экономикалық университетін «экономика саласындағы құқықтық реттеу» мамандығы бойынша және Президент жанындағы Мемлекеттік басқару академиясының магистрі.
Еңбек жолын 1999 жылы қазақ тілі мұғалімі болып бастаған. 2007 жылдан бастап мемлекеттік қызметте. Қарағанды облысының кәсіпкерлік және өнеркәсіп басқармасының қаржы, ұйымдастыру және кадр жұмысы бөлімінің бас маманы қызметін атқарған.
2008-2014 жылдар аралығында Қарағанды облысы әкімінің баспасөз қызметінде түрлі қызметтерді атқарған.
Бұқар жырау ауданы әкімінің орынбасары қызметін атқарған. Қарағанды облысы әкімінің Қазақстан халқы Ассамблеясы хатшылығын басқарды. Қарағанды облысы әкімі аппаратының «Қоғамдық келісім» коммуналдық мемлекеттік мекемесінің директоры, ішкі саясат бөлімінің басшысы болды.
2022 жылдың сәуір айынан бері Қарқаралы ауданының әкімі болып қызмет етті.
