Алматыда ірі жол апаты болып, төрт адам зардап шекті, деп хабарлайды “Адырна” тілшісі.
Алматының орталық көшелерінде түнде жол апаты орын алған. Әлеуметтік желіде тараған видеодан 6 бірдей көліктің соғылғанын анық байқауға болады. Видеода көлікті жалға алған азаматтың Абай даңғылында ірі жол апатын жасағаны айтылған.
Алматы қалалық полиция департаментінің мәліметінше, 22 қыркүйек түнгі 00:10-де Абай даңғылымен батыс бағытта «Volkswagen» автокөлігін жүргізіп келе жатқан 2004 жылы туған К. есімді жүргізуші тұрақта тұрған алты көлікті соққан. Жас жүргізуші көлікті жалға алған болып шықты.
«Жол апаты салдарынан төрт адам зардап шекті. Олар ауруханаға жеткізілді. Жол апатын Әуезов аудандық полиция басқармасы өндіріске қабылдады», — деп хабарлады қалалық полиция департаментінің баспасөз қызметі.
