Májilistiń jalpy otyrysyna depýtat Maqsat Tolyqbaı qazaqstandyqtardyń 8 myńnan astam ótinishin ákeldi, - dep habarlaıdy "Adyrna" tilshisi.
Májilismen Premer-mınıstr Álıhan Smaıylovqa depýtattyq saýal joldap, Almaty oblysyndaǵy saıajaı turǵyndarynyń máselelerin aıtty.
«Men saıajaılarda turyp jatqan, bıýdjetten bir tıyn da kómek almaıtyn adamdardyń aıanyshty jaǵdaıyn óz kózimmen kórdim. Rasynda, jaǵdaı óte qıyn, halyqtyń shydamy taýsylyp barady. Men ózim halyqpen kezdestim. Ótinishter kóp. Men ózimmen birge 8 myńnan astam halyqtyń hatyn ákeldim. Mine, osy ótinishterdiń barlyǵy», — dedi depýtat bir qorap qujatty kórsetip.
Ol oblysqa ózi baryp, Qonaev, Qarasaı, Eńbekshiqazaq, Talǵar, Jambyl jáne Ile aýdandarynda 674 saıajaı baryn bilgenin aıtty. Ondaǵy turǵyndardyń sany 500 myńǵa taıap qaldy. Sonymen qatar, jaqyn jerde qajetti ınfraqurylym joq: mektep, balabaqsha, qoǵamdyq kólik, medıınalyq qyzmet kórsetý, asfalt, poshta bólimshesi, baılanys toraptary, áleýmettik qyzmetter men áleýmettik nysandar joqtyń qasy.
«Júzdegen myń qandastarymyz saıajaı alqaptaryna «selo» mártebesin berýdi surap jatyr. Óıtkeni, qoldanystaǵy zańnamaǵa sáıkes, jergilikti atqarýshy organdar bıýdjettik qarajatty tek qala men aýyldyq eldi mekenderdi damytýǵa ǵana bóle alady», - dedi Maqsat Tolyqbaı.
Qonaevtaǵy saıajaı turǵyndary elektr jelilerine qatysty qıyndyqtardan zardap shegýde
Depýtat bul másele tek Almaty oblysynda ǵana emes, Qazaqstannyń basqa óńirlerinde de bar ekenin aıtty. Tolyqbaıdyń pikirinshe, úkimet máseleni sheshý úshin tez arada arnaıy baǵdarlama ázirleýi kerek.
