Нұрділдә Ораз Батыс Қазақстан облысы әкімінің аппаратына жаңа қызметке келді, - деп хабарлайды "Адырна" тілшісі облыс әкімінің баспасөз қызметіне сілтеме жасап.
«Қазақстан Республикасы Президенті Әкімшілігінің келісімі бойынша Ораз Нұрділдә Серікұлы Батыс Қазақстан облысы әкімі аппаратының басшысы болып тағайындалды», - деп хабарлады облыс әкімінің баспасөз қызметі.
Осы тағайындауға дейін ол Батыс Қазақстан облысының қоғамдық даму басқармасының басшысы қызметін атқарған.
Нұрділдә Ораз 1981 жылы дүниеге келген. Әл-Фараби атындағы Қазақ ұлттық университетін «Журналистика» мамандығы бойынша және ІІМ Бейсенова атындағы Қарағанды академиясын «құқық қорғау қызметі» мамандығы бойынша бітірген.
Ораз әр жылдары теледидарда жұмыс істеді, «31 арнада» «Информбюро» ақпараттық бағдарламасының қазақша редакциясының тілші - жүргізуші болды.
2009 жылы ішкі істер органдарына ауысып, Астана қаласы Ішкі істер департаменті, ҚР Тіл саясаты және ақпарат басқармасының бастығы, Ішкі істер министрлігі Мемлекеттік тіл және ақпарат департаментінің директоры қызметтерін атқарды.
Нұрділдә Ораз министрдің баспасөз хатшысы, кейін Ішкі істер министрлігінің ресми өкілі қызметін де атқарған. 2016 жылы ҚР Бас прокуратурасы аппараты басшысының орынбасары болып жұмыс істеді.
2019-2022 жылдар аралығында Ішкі істер министрінің кеңесшісі болды.
"Адырна" ұлттық порталы
