Іс бойынша прокурор Ерлан Құланбаев Мейіржан Төребаев пен Мейірхан Шерниязовқа тағылған айыпты ішінара өзгертті. Мемлекеттік айыптаушы оларды қылмыстық кодекстің 217-бабы 3-бөлігі 2-тармағында көрсетілген әрекетті жасады деп санайды.
Осылайша іс бойынша 12 сотталушыны да 5 жылдан 15 жылға дейінгі уақытқа бас бостандығынан айыруды сұрады.
Алмас Құрманғалиевке 15 жыл бас бостандығынан айыру жазасы тағайындалсын;
Дания Рахимоваға 15 жыл бас бостандығынан айыру жазасы тағайындалсын;
Ержан Мансұровқа 8 жыл бас бостандығынан айыру жазасы тағайындалсын;
Ерлан Мансұров 8 жыл бас бостандығынан айыру жазасы тағайындалсын;
Руслан Бұрқановқа (Mudarabah Capital ЖШС директоры) 12 жыл бас бостандығынан айыру жазасы тағайындалсын;
Нұрлан Сұлтанбаевқа 12 жыл бас бостандығынан айыру жазасы тағайындалсын;
Андрей Чаға 12 жыл бас бостандығынан айыру жазасы тағайындалсын;
Самат Қасеновке 12 жыл бас бостандығынан айыру жазасы тағайындалсын;
Мейіржан Төребаев 5 жылға бостандығынан айыру жазасы тағайындалсын;
Мейірхан Шерниязовқа 5 жылға бостандығынан айыру жазасы тағайындалсын, деді мемлекеттік айыптаушы.
Іс бойынша 12 сотталушы бар.
Тергеу мәліметтері бойынша, 2019 жылы бастапқыда Astex қаржылық пирамидасы құрылды. Оны Құрманғалиев өзінің туысы Мансұровтың көмегімен баю мақсатында құрған.
Құрманғалиев қылмыс жоспарын құрып, оған туысы Ержан Мансұровты тартты. Әрі қарай ұйымдасқан қылмыстық топ құрған. Мансұров жеке мүддесі үшін қаржы пирамидасын дамыту бойынша өзінің туысы берген тапсырмаларды орындаған. Мансұров 2019 жылы өз атына Astex ЖШС-ны тіркеген. (...) Құрманғалиев салымшыларға өз салымының жылына уәде етілген (айына 20 пайызға дейін) 240 пайызын төлей алмайтынын біліп, ұйымдасқан қылмыстық топ қызметін жалғастырды және жаңа салымшыларды тартты. Сондай-ақ жаңа салымшылар санын үнемі көбейтіп отыру қажет екенін түсінді, - деді мемлекеттік айыптаушы Ерлан Құланбаев.
Прокурор қаржы пирамидасын құрушылар тұрғындар арасында сенімділік орнату мақсатында бұл іске танымал адамдарды тарту туралы шешім қабылдағанын айтты.
2020 жылдың наурызында бұл іске Руслан Бұрқанов, Андрей Ча, Біржан Жармұхамед, Самат Қасенов, Тимур Рүстемов, Нұрлан Сұлтанбаев, Мейірхан Шерниязов пен Азимжан Саидбаевты тартты.
Бұл адамдар ұсынылған іс-әрекеттің заңсыз екенін түсініп, қаржы пирамидасына қатысуға келісім берген. Mudarabah Capital ЖШС-ны тіркеп, жарғылық капиталға қатысу үлестерін пропорционалды түрде бөлді. Бұл компания салымшылардың ақшасын тарту құралы ретінде пайдаланылуы қажет болған. Mudarabah Capital мен Astex арасында келісім жасалған соң Mudarabah Capital клиент іздеуге міндетті болды. Astex атынан келісім жасап, келісімнен кейін кеңес беруге және басқа да заңды операцияларды жүзеге асыруға міндеттелді. Бұл келісім Mudarabah Capital-дың Astex-тің құрылымдық бөлімшесі болғанын көрсетеді, - деді прокурор.
Ал мемлекеттік айыптаушы сотталушы Руслан Бұрқанов Mudarabah Capital ЖШС директоры болғанын айтады.
Азимжан Саидбаев пен Мейірхан Шерниязов Mudarabah Capital ЖШС құрылтайшысы болған. Олар үгіт-насихат жүргізу, әлеуметтік желіде жарнама жасауға жауапты болған. Сондай-ақ құрылтайшылар арасында қаражат бөлуге де қатысты.
2020 жылдың қыркүйегінде аталған адамдар қаржы пирамидасын танымал ету мақсатында әлеуметтік желіде 1 миллионнан астам жазылушысы бар Мейіржан Төребаевқа сыйақы беруге уәде беріп, бірлескен қылмыстық іс-әрекет жасау үшін жүгінді. Төребаев ұсыныстың заңсыздығын түсініп, пирамида сәтсіз болған жағдайда қылмыстық жауапкершіліктен құтыла алатынына сенімді болып, ұйымдасқан қылмыстық топтың құрамына кіруге келісім беріп кірген. Ол салымшыларға ай сайын уәде етілген пайыз төлеу мүмкін емес екенін түсініп, заңсыз қаржы пирамидасы екенін біліп, жұмыстан кіріс табатынын ойлап, салымшылардың қаражатынан айырылатынын түсініп, өз жұмысын бастады, - деді мемлекеттік айыптаушы.
Мейіржан Төребаев компания құрамында жарнама жасау, үгіт-насихат жұмыстарымен айналысқан. Сондай-ақ ол Mudarabah Capital құрылтайшысы қатарында болған.
Ал Шерниязов пен Төребаев қаржы пирамидасын құрды және ұйымдастырды деген айыппен келіспеді және кінәсін мойындамады.
