Қарасай аудандық сотының шешімімен Болат Назарбаевтың иелігінде болған "Барыс" базары қайтарылды. Сот шешімімен жалпы көлемі 37,6 гектар жер телімдерін ("Барыс" автобазары) сатып алу және сату шарттары жарамсыз деп танылды, деп хабарлайды "Адырна" ұлттық порталы.
Соттың баспасөз қызметінің айтуынша, даулы мәселеге қатысты нақты шешім 17 сәуірде жарияланған. Қарасай ауданы прокуратурасының жер телімдерін сату туралы шарттарды жарамсыз деп тану талап-арызы қарастырылды. Нәтижесінде, Сот қазысы Ахметова А.Б. талап-арызды мақұлдады.
Естеріңізге сала кетейік, прокуратура, жергілікті әкімдік және Болат Назарбаев арасындағы жер меншігіне қатысты іс наурыз соңында басталған еді.
Деректерге сүйенсек, 2004-2019 жылдар аралығында жер телімдерін сату бойынша 7 келісімшарт жасалған. Мемлекет жерлері әр уақытта Қарасай ауданы, Қаскелең әкімдігі және аудандық жер қатынастары бөліміне берілген.
Алайда жер телімдерін беру кезінде өрескел заңбұзушылықтар болған. Сондықтан прокурорлар сатып алу-сату келісімдерін жарамсыз деп танып, жерді қайтадан мемлекет меншігіне қайтаруды талап етті.
"Адырна" ұлттық порталы
