Мәжіліс депутаты Жигули Дайрабаев мандатын тапсырмайды. Бұл туралы «Ауыл партиясы» фракциясының жетекшісі Анас Баққожаев айтты, деп хабарлайды «Адырна» тілшісі.
«Дайрабаев депутаттық мандатын тапсырмайды. Мен фракцияның мәлімдемесін айтып отырмын. Біз оған ешқандай мін таға алмаймыз.
Біріншіден, оның жеке басына қатысты аталған істе ештеңе айтылмаған. Екіншіден, оның балалары ересек азаматтар. Олар өз ісіне өздері жауап беруі керек»,— деді Баққожаев.
Айта кетейік, алаяқтық жасады және ірі мөлшерде ақша жымқырды деп айыпталған Марат Дайрабаев және Дидар Молдақалықтың мүлкі тәркіленіп, кез келген меншік нысанындағы ұйымдарда басшылық лауазымды атқару құқығынан айырылды. Екеуі де 5 жылға шартты түрде бас бостандығынан айырылды. Оларға пробациялық бақылау қойылады.
