«Солардың кесірінен талай адам өліп кетті» - аурухана дәрігері басшылыққа шағым айтып, бізге хат жолдады

3475
Adyrna.kz Telegram

Жамбыл облысының қоғам белсендісі Берікбол Уәлиханов Жамбыл облысындағы Денсаулық сақтау басқармасының қазіргі басшысы Жанар Оспанованың қызметін тексеруді талап етеді. Бұл туралы ол Facebook парақшасына жазды. Сонымен қатар, "Адырна" ұлттық порталына Жамбыл облысы, Меркі аудандық орталық ауруханасының дәрігері Қызылов Асқар есімді азаматтан хат келіп түсті. Дәрігердің айтуынша, аурухана басшылығы мамандардың еңбегін қанап отыр. Онымен қоймай, жұмыста себепсіз қаржы жинату, дәрігерлердің үстемақысын қалтасына басу сынды күдікке іліккен. Тіпті, аурухана басшылығы адамдардың нақақтан-нақақ қайтыс болуына да себепкер болған. Екі азаматтың шағымы бір адамның қызметін айыптаумен тоғысады, деп хабарлайды «Адырна» ұлттық порталы.

Белсенді Берікбол Уәлихановтың айтуынша, қазір Жамбыл облысындағы денсаулық сақтау басқармасы былыққа батып жатыр. 

“Жамбыл облысы денсаулық сақтау басқармасындағы жүйелі сыбайлас жемқорлық, кадрлық заңсыздық пен келеңсіздіктерге толы интригалар Түркістан облысындағыдай көрініс тапты. Бұл ӨҚБ жаңа бастығының келуімен, яғни Желтоқсан 78 көшесіндегі тоғыз қабатты ғимаратта орналасқан ӨҚБ сыбайлас жемқорлық басқару құрылымындағы Ж.М.Оспанова ханым және оның командасына тығыз байланысты. Ол және оның жақын серіктері қатардағы емес қызметкерлерді негізсіз жұмыстан шығарып, тексере бастады. Басшылар түрлі сылтаулармен бопсалап, лауазымдық өкілеттіктерін асыра пайдаланып, «крышасы» жоқ немесе ай сайын аз-аздап алым-салық беретін, жоғарыда көкелері жоқ бас дәрігерлерге тиісуде.

Мен күн сайын Оспанова ханым мен оның командасының барлық дерлік істері туралы ақпарат аламын. Қазір оның командасы мен Оспанова ханым маған ақпаратты кім айтатынына алаңдаулы. Әдетте ақымақ адамдар осылай жасайды. Мені бопсалайды, маған күйе жағады. Олар менің үстімнен компромат іздейді, мені сотпен қорқытады. Ең қызығы, олар әлі күнге дейін белгілі бір соманы ұсынбаған”,- деп жазды ол.

Сондай-ақ, Берікбол Уәлиханов Оспановаға бәрін қалпына келтіруді талап етті.

“Оспанова ханым, дәрігерлер мен медицина қызметкерлерін қорқытуды доғарыңыз. Мен бас дәрігерлерімізді қорғамаймын. Олар тек өз емханасының немесе ауруханасының масштабында жүрген сіз сияқты жемқор шенеуніктер. Енді міне, сіздің хандық амбицияларыңыздың кесірінен облыстың денсаулығы нашар. Облыстың денсаулық сақтау саласын жемқорлықтан, интригадан, рушылдықтан, парақорлықтан, ұрлықтан, дәрігерлердің кәсіби еместігінен т.б. қалпына келтіріңіз.

Тыныш келіп, уақытыңызды өтеп, ар-ұжданыңызды сақтап, Астанаға қызметке кеткеніңізде мен бір ауыз сөз айтпас едім. Өйткенi, сіздің қызметкеріңіз Әсет Қалиев Ақтөбе облысынан қылмыстық қудалаудан қашып Бердiбек атасының қанатының астында. Ол судан да тыныш, шөптiң астында қызмет етiп,  сіз ақша табатын «жобалар мен, реформаларды» тастап қашып кеткен. Олар Түркістан өлкесіндегідей ештеңе істемейтін. Бірақ неге қол астындағыларға салық саласыз? Дәрігерлердің Президент Қ.Ж. Тоқаевқа үндеу жолдауын күтудесіз бе?”,- деп жазды Уәлиханов.

Уәлиханов ЖИТС орталығының қызметкерлері WhatsApp арқылы жазғанын, олардан да ақша жинайтынын айта кетті.

“Міне, ЖИТС орталығының  қызметкерлері маған WhatsApp арқылы жазды: Адаш Шалабайқызы Молдашева барлық ауруханалардың, емханалардың штаттық қызметкері болып, тоқсан сайын бас дәрігерлердің орынбасарларының, бас бухгалтердің жалақысын және басқа да сомаларын бекітіп, облыс бойынша қаржы экономикасы жөніндегі орынбасары Перизат Жолдұғұлқызының үлесіне қосады. Ай сайын газ талонын туыстарының ауруханаларынан алады.

Ал ЖИТС орталығы Молдашеваға ай сайын 200 литр бензин тасиды, басқа да ауруханалар сыйақы төлейді. Сондықтан Молдашева бас дәрігерлер мен орынбасарлардың жалақысын бекіту үшін 50 мыңнан алым жинап алып, жұмыстан шығармайды. Бір ауруханада 8 қол позиция бар, бұл қазірдің өзінде 400 мың. Бұл бір ғана аурухананы есептегенде, бірақ облыстағы қаншама ауруханадан ақша жинайды?!

Үмбеталиева Перизат Жолдығұловна денсаулық сақтау саласының жаңа басшысын жаңылыстыруда, барлық емдеу мекемелерін негізсіз тексеріп, бас дәрігерлердің есеп картасын алып, барлығын қорқытып, олардың орынбасарларын қысқартады. Егер ол өзі денсаулық сақтау басқармасының экономика және қаржы жөніндегі орынбасары болса, неге облыс әкімі оның лауазымын қысқарту туралы мәселе көтермейді және ол облыс әкімі сияқты әрекет етеді? Сондай-ақ, бәрін өзі шешеді.

Оспанова ханым, штаттан тыс қызметкер Молдашева Адас сол арқылы деректер жинайды. 30 жыл денсаулық сақтауда жұмыс істейді, 5 жылдан бері зейнеткер, қазір фрилансер болып барлық ақшаны, тауарды және талонды өзі арқылы алып отыр. Осы Үмбеталиев, Молдашева қызметкерлерін орнына алып тастаңыздар”,- деді қоғам белсендісі.

Сонымен қатар, Берікбол Уәлиханов ЖИТС орталығын да тексеруді талап етті.

“Олар облысты қаржыландырмайды, Фомс барлық медициналық ұйымдарға ақшаны тоқтатып тастады, облыстың емдеу мекемелерінен қандай жоспар сұраса да, бәрі қарызға батады. Ақша үй жануарларына көбірек бөлінеді.

ЖИТС орталығының  жұмысын тексеріңіз. Адас Шалабайқызының жиені және  барлық медициналық мекемелерде туыстары қызмет етеді. Ол барлық туыстары мен жақындарын штаттан тыс экономист Молдашевамен бірге негізгі қызметтерге қоюға шақырды”,- деді Уәлиханов.

Мұнымен қоса, Жамбыл облысы, Меркі аудандық орталық ауруханасының дәрігері Қызылов Асқар есімді азамат өз жұмысындағы бассыздықты ашып айтып, хат жолдады. Хатын оқырман назарына ұсынамыз:

- 2021 жылы ұжымнан газет аласыңдар деп қаржы жинап алды. Бірақ бір жылдық газет келген жоқ. Мұны ашық айта бастап едік, қайтадан ақша жинап, 2023 жылдың газетіне жаздырды. Бұл не қылғаны? Жасыратын түгі жоқ, ауруханамыздың жай-күйі кетті. "Жан сақтау",  "Хирургия" бөлімінің жөндеу жұмыстарын созып жіберді. Оның өзі оңып тұрған жоқ. Ал халықтың не кәнісі бар? Сіз білесіз бе, халық қанша уақыт осы ауруханада қатты қиналды? Дәрігерлердің жұмыс істейтін орны да жоқ. "Жансақтау" бөлімін алды да басқа жаққа көшіріп жіберді. Содан талай адам өліп кетті. Оны жасырмаймын.

Басшылық ауруханада аумағында болмаған «48 аймақ» деген ғимаратты жалған құжатқа енгізіп, ақша алып келді. Олар – 8 адам. Сыбайлас жемқорлыққа қарсы басқарманы шақытып, тексерттік. Арасында біреуін ғана кінәлі қылып шығарып, соған бар қылмысты үйіп-төкті. Оспанова мұнымен қоймай қызметінде өрлеп, Таразға үлкен бастық болып ауысты. Өзінің күйеубаласын қызметке тағайындап кетті. Күйеубаласы сауатсыз маман. Біліктілігін арттыру бойынша білім алып келген болды. Оның өзін айтсаң, ұят. Қыздардың "жыныстық пердесін қайта тігу" бойынша оқып келген Оспанованың күйеубаласы бізді басқарып отыр. Дені дұрыс оқуы да жоқ.

Жұмыстағыларға қолдау ретінде бұрғынғы Мақатова деген бастығымыз үстемақы төлейтін. Оны бұлар қысқартып тастады. Медбикелер аяқтан тозып, көше-көшені аралайды. Оларға аяқ киім шақ келмейді. Ал басшылық соған бөлінетін қаржыны қалтасына басып отыр.

Біз бір жылда біз 192 миллион таптық. Дәрігерлерге соның 30%-ын беріп, қалғанын Үкіметке қалдырсын. Ол да жоқ. Халыққа жұмыс істегім келеді. Екі маманның жұмысын бір өзім атқарып отырмын. Ал еңбегіміз бағаланбайды, тек қанау ғана. Лайық еңбекақым қайда? Мен халықтан теріс айналмаймын, басшылық жөнге келуі керек. Мемлекеттің қаржысы талан-таражыға түсіп жатыр.

Сонымен қатар, берекесі кеткен аурухананың басшылығына шағым айтқан дәрігер бізге арызын да қоса жолдады. Арызда ол жол-cапар ақшасының төленбегенін, пандемия кезіндегі "былықтарды" айыптайты. Жөндеу жұмыстары барысында қаржы жымқырған басшылыққа қатысты тыңғылықты тергеу жүргізуді талап етеді.

"Адырна" ұлттық порталы аймақтық ауруханадан шыққан кикілжіңді өз бақылауында ұстайтын болады.

"Адырна" ұлттық порталы 

Пікірлер