Қамауда отырған журналист Михаил Козачков президентке тағы үндеу жолдады, деп хабарлайды “Адырна” тілшісі.
“Құрметті Қасым-Жомарт Кемелұлы!
Мазалағаным үшін кешірім сұраймын. Мен журналист Михаил Козачков сізге жүгінемін. 18 желтоқсан күні жасамаған қылмысқа күдікті ретінде қамалдым. Бірақ бүгін мен басқа нәрсе туралы жазғым келеді. Менің болжамды қылмыстарымды тергеумен Қаржы мониторингі агенттігінің жедел-тергеу тобы айналысады. Өкінішке қарай, ҚМА қызметкерлері менің құқықтарымды жиі бұзатыны сонша, олардың әрекеттері туралы сізге шағымдануға мәжбүрмін”, – деп жазды Козачков.
Оның айтуынша, ол ұсталған күні және үйді тінту кезінде де адвокат болмаған.
Агенттік қызметкерлері Козачковтың балаларының компьютері мен планшетін тәркілеген. Бұл балалардың білім алуына кері әсерін тигізгенін айтады.
“Мен екі апта болған тергеу изоляторының камерасынан радио микрофон таптым, тіпті түрмеде отырғанда да мен үнемі бақылауда боламын деген ойға келдім. ҚМА қызметкерлері менің әпкелеріме тінту жүргізген. Олардың біреуі куәлік беруден бас тартқанына қарамастан, жауап алынды”, – деп жазды ол.
