96 жасына қараған шағында Рим Папасы Бенедикт XVI (Йозеф Алоиз Ратцингер) қайтыс болды. Бұл жөнінде сенбі күні қасиетті престолдың баспасөз қызметі мәлімдеді, деп хабарлайды “Адырна” ұлттық порталы.
"Рим Папасы құрметті Бенедикт XVI бүгін сағат 09:34-те Ватикандағы Mater Ecclesiae монастырінде қайтыс болғанын қайғыра отырып хабарлаймыз", – делінген хабарламада.
Айта кетейік, Бенедикт XVI (Йозеф Алоиз Ратцингер) 2005 жылдың сәуірінен 2013 жылдың ақпанына дейін Апостол тағында болды. Ол 265-ші Рим Папасы және Рим Папасы Клемент XII-ден (1730 жылы сайланған) кейін сайланған ең қарт апостол ретінде белгілі. 2013 жылдың 11 ақпанындағы консисторияда Бенедикт XVI күтпеген жерден тақтан бас тарту туралы шешімін жариялады. Содан бері ол Ватикан бағындағы Mater Ecclesiae шағын монастырында тұрған.
