Астанада Қайрат Сатыбалдыұлының ісі бойынша онлайн сот өтіп жатыр. Бұл туралы "Адырна" ұлттық порталы хабарлайды.
Қайрат Сатыбалдының ісін Астанадағы №2 Байқоңыр аудандық соты қарауда. Сот оны "Алдау немесе сенімге қиянат жасау жолымен мүліктік залал келтіру"," Кінәліге сеніп тапсырылған бөтен мүлікті иемдену немесе талан-таражға салу" баптары бойынша күдікті деп таныды.
Қ. Сатыбалдыұлы ірі көлемдегі қаражат жымқырғаны үшін айыпталып, 13 наурызда ұсталған болатын. Нәтижесінде Сыбайлас жемқорлыққа қарсы іс-қимыл агенттігі тергеу жүргізіп, мемлекетке 240 миллиард теңге қайтарылған.
Сот басталар алдында зум-видеода Қайрат Сатыбалдының бауыры Самат Әбіш те байқалды. Қайрат Сатыбалдының қорғаушысы оның 12 миллиард теңге көлемінде залал келтіргенін, өз қатесін толық мойындайтынын жеткізген. Сотталушы жеңілдетілген жазадан да үмітті екендігін жасырмады.
